عقب الإعلامي عمرو أديب، على فوز النادي الأهلي على الزمالك بهدفين مقابل هدف في الدوري المصري، قائلا: "الأهلي يستحق الفوز، والزمالك ضيع فرصة تاريخية، وملعبش بنكلة، مفيش ثقة كالعادة، قلبي يقطر دما، أنا مضايق".
وأضاف أديب خلال برنامج "الحكاية" المذاع عبر فضائية "إم بي سي مصر"، اليوم الإثنين، "الشياطين الحمر.. هما عندهم ثقة أنهم هيكسبوا، الحظ عمل كل حاجة للزمالك، والزمالك رفسه"، لافتا إلى أن نصف لاعبي النادي الأهلي مصابة، متابعا: "المدرب اللي بيدرب الأهلي مؤقت، واللاعب اللي غير النتيجة ماشي، ونص اللاعيبة مصابة.. وفالأخر الزمالك مكسبش، وكان ممكن الأهلي يفوز بأهداف أكتر".
وتابع، "الجمهور مش مصدق، طب إمتى هنكسب الأهلي.. كده الدوري خلص، حتى لو الأهلي مأخدوش، هياخده فريق تاني، كان عندي يقين أن الأهلي هياخد ضربة جزاء، كان في لاعب كل دوره أن كل ما الشاب البرازيلي يمسك كرة يدوس عليه.. اليوم أعلن لكم ضياع الدوري من الزمالك، هى نفس الكسرة بتاعة كل سنة، كنت شايف الزمالك متقدم وطلع خايب".
وعن تقبيل اللاعب حسين الشحات للشنكار، علق أديب: "شنكار إيه اللي بتبوسه الزمالك معاه نحسه في الملعب، أنا مش بقف جمب متخاذلين متراجعين، عندي 60 سنة منهم 55 سنة بشوف الزمالك بيتغلب، ونصيحة للأسر لو لقيت عيل عنده ميول زملكاوية ارحمه عشان هيتعذب موت الفكرة قوله الأهلي نادي مصر".
