يا ترى ايه اللى بيحصل على الأرض علشان الحكومة تنقذ المصانع المتعثرة وترجعها تشتغل تاني، وإيه الخطة اللي الدولة وأصحاب الصناعة بيشتغلوا عليها علشان العجلة تدور؟
في الحقيقة، الحكومة شغالة على خطة شاملة دلوقتي لإنقاذ المصانع المتعثرة واللي وصل عددها لأكتر من 7 آلاف مصنع، وأول خطوة كانت انها عملت حصر دقيق لكل المصانع المتعثرة، عشان تعرف ليه وقفت هل لأسباب مالية ولا مشاكل فنية ولا إجراءات تانية معقدة ولا حتى سوء إدارة من أصحابها.
والخطة كمان بتشمل مراجعة الحسابات المالية لكل مصنع، وفحص المعدات والآلات والتكنولوجيا اللى بيشتغل بيها، فهل عي محتاجة تحديث ولا لأ، وده طبعا لهدف إنها تلاقي العطل فين بالظبط عشان تعرف تصلحه.
والحكومة بالفعل قدرت ترجع 987 مصنع للشغل من أصل أكتر من 7 آلاف مصنع متعثر، ودي خطوة أولى مهمة لكنها لسه في بداية الطريق زي ما قال وزير الصناعة كامل الوزير.
كمان، في مبادرات مهمة شغالة زي "مصنعك دايما شغال" اللي أطلقتها وزارة التجارة والصناعة، واللي بتركز على إعادة دمج المصانع المتعثرة في دورة الإنتاج من خلال تسهيلات وحوافز مختلفة، والدعم مش مالي بس لكن كمان في استشارات بنكية وتقنية للمصانع عشان يوصلوا لمرحلة الإنتاج وتحقيق الأرباح، بجانب حلول في الهندسة المالية لتعظيم القدرات وفتح أبواب جديدة للاستثمار سواء في أسواق المال أو البورصة.
بردو، الخطة بتعتمد على تطوير استراتيجيات التسويق للمصانع عشان منتجاتهم توصل لأسواق أكتر سواء جوه مصر أو بره وده بيشمل فتح قنوات توزيع جديدة والتعاون مع سلاسل توريد عالمية.
وفي تركيز على التدريب وتأهيل العمالة لأنك حتى لو عندك معدات حديثة فلازم يكون فيه ناس مدربة تعرف تستخدمها بكفاءة وده بيزود الإنتاجية وجودة المنتج.
كمان، الحكومة بتسعى لتسهيل الإجراءات البيروقراطية زي تراخيص التشغيل والضرايب عشان تقلل الضغط الإداري على أصحاب المصانع وتخليهم يركزوا أكتر على الإنتاج والتطوير.
وآخر نقطة هي المتابعة المستمرة للمصانع اللي رجعت تشتغل، عشان الحكومة تتأكد إنها مش بس اشتغلت لكن كمان استمرت في النمو وحققت أرباح وده اللي بيضمن استدامة النجاح على المدى الطويل.
والخلاصة، هي ان الخطة عبارة عن شغل ميداني وحلول مالية وفنية مع دعم حكومي ومبادرات خاصة عشان نشوف المصانع دي راجعة تشتغل وتوفر فرص عمل وتزود الإنتاج وتنعش الاقتصاد.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
