"سفاجا2" أقوى محطة لوجستية عملاقة.. سر ارتفاع ...

منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. البداية بتقرير عن "سفاجا 2" أقوى محطة لوجستية عملاقة.

قال التقرير، إن مصر بتتحول دلوقتي لمركز لوجستي ضخم على البحر الأحمر.. وهنا الكلام عن محطة لوجستية عملاقة اسمها سفاجا 2، ودي هتتبني جوه ميناء سفاجا البحري، واللي الهدف منها تحويل المينا لمحور نقل وتجارة إقليمي يخدم الصعيد والبحر الأحمر وكمان يربطنا بالخليج وشرق آسيا.

وأضاف التقرير، أن المحطة دي مش مجرد مخازن، دي هتكون مؤهلة لاستقبال البضايع والحاويات وتفريغها وتخزينها، وكمان فيها تجهيزات حديثة للنقل السريع والمبرد وكل الخدمات اللوجستية اللي بتخطر على بالك، ومش بس كده.. المشروع هيقلل الضغط على مواني تانية زي العين السخنة والسويس، وكمان هيكون فيه ربط مباشر بين المينا وشبكة الطرق الجديدة عشان يوصل البضايع لأهل الصعيد بسرعة وكفاءة.

وأوضح التقرير، أن محطة سفاجا 2 بتتعمل على مساحة حوالي 776 ألف متر مربع، وبتضم رصيف بطول 1100 متر وعمق 17 متر، يعني تستقبل سفن ضخمة وحاويات بكفاءة عالية.. والمفاجأة السارة كمان أن أعمال البنية التحتية خلصت بالكامل، ونفذتها شركات مصرية وطنية، ودلوقتي شغالين على البنية الفوقية بأحدث المعايير العالمية.

وأشار تقرير بانكير إلى أن المحطة لما تشغل بكامل طاقتها، هتقدر تتعامل مع 2 مليون حاوية سنويًا، وكمان 7 مليون طن بضايع عامة... وده هيزود القدرة التنافسية للميناء وهيخليه محور تجاري ضخم في المنطقة.

منصات بانكير قدمت تقرير مختلف النهاردة عن سر ارتفاع الدولار وتأثيره على الجنيه المصري.

قال التقرير إن الدولار مبيعلاش في مصر بس، لأ دي حركة عالمية متأثرة بكذا عامل، أولهم الرسوم الجمركية الجديدة اللي فرضتها أمريكا، واللي سببت تذبذب في سوق الصرف الأمريكي نفسه، يعني الدولار عالميا نزل شوية لكن فضل محافظ على مكاسب أسبوعية، وده عشان بيانات اقتصادية خرجت من أمريكا وقالت إن التضخم هناك مش بالسوء اللي الناس كانت متوقعاه وده خفف المخاوف، بس في نفس الوقت في إشارات إن التضخم ممكن يرجع يعلى في الصيف، حسب كلام رئيس الفيدرالي الأمريكي "چيروم باول"، والسبب هو السياسات التجارية والجمركية الجديدة اللي أمريكا شغالة بيها.

وأجاب التقرير، على سؤال: هل الجنيه ممكن يرجع أقوى تاني؟.. واللي قال إن فيه 3 حاجات لازم تحصل، أولها ضخ استثمارات أجنبية قوية تدخل السوق، وتاني حاجة هي تحسن كبير في إيرادات الدولار من السياحة والتصدير وتحويلات المصريين، وأخيرا استقرار اقتصادي وسياسي أكبر عشان يخلي المستثمرين عندهم ثقة في السوق.

وشرح التقرير، الدور المهم لصفقة رأس الحكمة، واللي ساعد على تهدئة السوق لفترة، لكن لسه الطريق طويل لأن المستثمر الأجنبي عايز يشوف إصلاحات على الأرض مش بس وعود، وعايز يشوف مرونة أكتر في السياسة النقدية وسهولة في تحويل الأرباح بالدولار.

وحدة أبحاث بانكير قدمت تقرير خاص النهاردة عن تعويضات لعملاء الإنترنت المنزلي بعد حريق سنترال رمسيس.

كشف تقرير بانكير، أنه حصل تطور جديد بعد الحريق اللي حصل في سنترال رمسيس، وخرج الجهاز القومي لتنظيم الاتصالات وأعلن رسميا عن تعويضات إضافية لعملاء الإنترنت المنزلي اللي اتأثروا بانقطاع الخدمة، كمان الجهاز قرر يدي تعويض على حسب نوع الاشتراك، يعني لو انت مسبق الدفع، يعني بتشحن باقة كل شهر بنفسك هيتم إضافة 50% من الباقة الأساسية بتاعتك كهدية مجانية، أما بقى لو انت عميل فاتورة، يعني بتدفع اخر الشهر، فهيجيلك خصم 30% من قيمة الفاتورة اللي جاية، وده كله طبعا عن الفترة اللي حصل فيها تأثر بالخدمة واللي كانت نتيجة الحريق المفاجئ في السنترال.

وأوضح التقرير، أن الموضوع مش بس تعويض وخلاص، لأ ده كمان الجهاز قال إنه مستمر في متابعة الشركات عشان يضمن إن الخدمة تفضل مستقرة وإن الأعطال الكبيرة دي ما تتكررش تاني، وده تأكيد على إن فيه رقابة ومتابعة من الدولة لحماية حق المستخدم ورضا العميل بقى أولوية مش رفاهية.

وأشار تقرير بانكير إلى أن التعويض ده وفقا للجهاز القومي لتنظيم الاتصالات، بدأ يتنفذ فعلا من يوم 18 يوليو، وده معناه إن المفروض دلوقتي تبقى شايف التأثير في حسابك، ولو ما حصلش، تقدر تتواصل مع خدمة العملاء بتاعة شركتك وتسألهم بشكل مباشر.

وأكد التقرير، أن الجهاز قال بشكل واضح إنه بيشتغل على تعميم نظام التعويضات في كل حالات الانقطاع الكبيرة اللي بيكون فيها خلل من الشركة أو ظروف طارئة زي اللي حصل في سنترال رمسيس، وده جزء من خطة أكبر لتحسين جودة الخدمة ومحاسبة الشركات لما يحصل أي تقصير، وفي النهاية لازم نعرف إن التعويض ده حق المستخدمين.