مصر ممكن تبقى مركز تصنيع إقليمي لأطراف صناعية.. والجنيه اللي كان بيعاني السنين الأخيرة هيسترد قوته وهنحوّل الديون لمشروعات تنموية.. وفيه خطة تعاون إنمائي بين مصر والصين هتستمر لـ 5 سنين جاية.. ية ترى كل ده هيحصل إزاي.. وإيه حكاي. التعاون المصري الصيني اللي هيتغير خريطة الاستثمار؟
فيه زيارة تاريخية حصلت الأيام اللي فاتت.. العاصمة الإدارية كانت على موعد مع توقيع 5 اتفاقيات جديدة بين مصر والصين في اطار خطط استراتيجية معمولة بالمسطرة.. هتأثر على شكل الاقتصاد المصري السنين الجاية بشكل ماحصلش قبل كده.
وأهم حاجة حصلت ان مصر والصين وقّعوا أول استراتيجية تعاون إنمائي للفترة من 2025 لـ 2029 بجدول زمني وتعاون حقيقي في ملفات زي الصحة.. الاتصالات.. المناخ.. التعليم.. الاقتصاد الرقمي.. الصناعة.. وكمان الفضاء.
لأول مرة مصر بتشتغل على مشروع تنموي مع الصين وفق رؤية مصر 2030 ومبادرة التنمية العالمية اللي الصين بتقودها.. وده معناه إنك هتشوف قريب مشروعات مصرية صينية مشتركة في أماكن كتير.. من المصانع الخضراء للتعليم التكنولوجي.. ومش بعيد تشوف تليفون أو جهاز مصنع في مصر بتكنولوجيا صينية.
الخبر الأكبر.. إن مصر وقّعت أول اتفاق مبادلة ديون مع الصين.. يعني جزء من الديون اللي على مصر للصين.. هيتحوّل لمشروعات تنموية على الأرض.. وده مش أول مرة مصر تعملها.. سبق ونجحت مع إيطاليا وألمانيا.. بس الفرق إن دي أول مرة الصين نفسها تمضي اتفاق من النوع ده مع أي دولة.
وده معناه ببساطة إن الصين شايفة إن استقرار مصر الاقتصادي بقى يستحق الاستثمار طويل المدى.. وده بيخلي الجنيه اللي عليه ضغط.. يبدأ يشتغل لصالح التنمية بدل ما يكون عبء.
في اتفاقيات تانية حصلت في نفس الزيارة.. منها مشروع تطوير منظومة الأطراف الصناعية.. الصين هتمول دراسات الجدوى بقيمة 1.5 مليون يوان.. والمشروع هدفه إن مصر تبقى مركز إقليمي في الشرق الأوسط وأفريقيا لإنتاج الأطراف الصناعية.. يعني مش بس هنعالج بيها المصريين.. لأ.. هنصدر ونصنع ونبني صناعة جديدة من الصفر.
وبالاضافة لكدة الصين كمان هتدي مصر 2000 فرصة تدريب للكوادر الحكومية في مجالات مختلفة لحد سنة 2027.. وده معناه بناء قدرات بشرية مستدامة.. مش مجرد تمويلات وخلاص.
كمان فيه منحة صينية لإنشاء معمل السلامة الحيوية من المستوى الثالث.. وده واحد من أهم وأخطر أنواع المعامل اللي بتشتغل على الفيروسات شديدة العدوى.. معمل مغلق وآمن على أعلى مستوى.. وده هيرفع قدرات مصر البحثية في الأوبئة.. خاصة بعد اللي حصل في العالم مع كوفيد.
المؤكد ان الصين مش جاية تستثمر بس.. الصين جاية تبني شراكة طويلة الأمد.. مصر مش بس بتاخد فلوس.. لأ.. مصر بتاخد معرفة.. تكنولوجيا.. تدريب.. وتوطين لصناعات المستقبل.
والصين شايفة إن مصر بوابة لإفريقيا.. و"اقتصادية قناة السويس" ممكن تبقى المركز اللي منه تصدر منتجاتها للعالم كله.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
