كشف سيد عبد الحفيظ نجم الكرة المصرية السابق، عن عودته من جديد للعمل داخل جدران النادي الأهلي، خلال الفترة المقبلة.
عودة سيد عبد الحفيظ إلى الأهلي
قال سيد عبد الحفيظ: “أنا مخرجتش من النادي الأهلي عشان أرجعله تاني، أنا بقالي 36 سنة في الأهلي ومعنديش شغف لحاجه تانية غير النادي ده”.
وتابع عبر برنامج الكورة مع فايق: “وأنا لسة صغير في ناشئين الأهلي، المدرب بلغني إن بكرة أول ماتش ليا مع الفريق، وأنا كنت باجي من الفيوم ومش عارف هعمل ايه ولا هبات فين”.
وواصل: “دخلت أصلي المغرب وقعدت عند عامود كده، لقيت عم غريب والد صاحبي محمد كان معايا في الفريق وقتها بيقولي هتعمل إيه، قلتله مش عارف قالي تعالى هتبات معانا النهاردة”.
وأكمل: “ومن وقتها ورغم إن إبنه مشي من الفريق بعد سنة، إلا أنه فضل متابعني وبيشجعني دايما وطول الوقت، وبكون قاعد عندهم واعتبرني واحد من ولاده، جميله ده عمري ما هقدر أرده”.
وأشار: “هو إتوفى السنة دي، أنا حسيت ساعتها إن أبويا إتوفى تاني، أنا عمري ما قلتله إني بحبه بس لما أروح عند ربنا هقوله، إن أي حاجة حلوة فيا في ميزان حسنات الراجل ده”.
تصريحات سيد عبد الحفيظ
وذكر: “مبتكلمش عن خلافي مع الخطيب، لأني مبنساش أبدا أفعال خير كتير بتحصل معايا وبحاول دايما إن اللي بيعمل معايا معروف بشيل له ده، ممكن يبقى فيه اختلاف مع ناس وبنتقابل ونتعاتب مفيش مشكلة لكن مع الكابتن الخطيب ده مكانش خلاف لكن رؤية في وقت ما وعمري ما أنسى إنه أول واحد حطني على الطريق، إن أنا أبقى مدير كورة”.
وزاد: “أول مرة أسمع إسمي في المنصب ده كان بسببه في نوفمبر 2010، لما أخدوا رأيي رشحت إن كابتن هادي خشبة يستمر ولما أخدوا رأي كابتن الخطيب قال سيد عبد الحفيظ”.
وأوضح: “كنت بشتغل منسق، بعدها نزلنا ولما كلمته قالي بثق فيك ومتأكد إنك هتبقى نموذج حلو وناجح، وإن شاء الله ربنا هيكرمك، الجزء لا يمكن يغطي على الكل أبدًا، هو مجرد جزء، لكن الكل حلو”.
وأتم: “كل اللي إحنا فيه إحنا وأهلنا وولادنا من خير الأهلي وربنا جعله سبب في ده، أنا قاعد قدامك عشان أنا سيد عبد الحفيظ بتاع الأهلي مش عشان أنا جامد”.
