من جديد أسعار الذهب رجعت ترتفع من جديد وسعر الجرام عيار 21 وصل لارقام كبيرة لاول مرة في التاريخ.. ياتري اية سر الزيادات الكبيرة اللي حصلت في الأسعار.. وهل الأسعار هتستمر علي الوضع ده ولا ممكن نشوف إنخفاض جديد في الأسعار .
الساعات اللي فاتت أسعار الذهب في مصر وصلت لارقام هيا الاعلي في التاريخ، والجرام عيار 21 سجل أكثر من 5 آلاف جنية للمرة الثانية في التاريخ، وطبعا كل الناس بتسأل عن أسباب الارتفاعات الكبيرة اللي حصلت في الأسعار، وهل الأسعار هتفضل مكملة في الارتفاع كده علي طول ولا في احتمالية أن الأسعار يرجع يحصل فيها انخفاض من جديد.
طيب اية الأسباب اللي خلت أسعار الذهب ترتفع للأرقام دي في مصر؟.
في البداية لازم نكون عارفين ان أسعار الذهب في مصر مرتبطة ارتباط مباشر مع السعر العالمي، واللي حاليا مسجل اعلي أرقامه وسعر الاونصة حاليا بيسجل أكثر 3700 دولار، وده كبيرة أولها ارتفاع حده التوترات الجيوسياسية والاقتصادية واللي بقي موجودة ومنتشرة بين عدد كبير من دول العالم، واللي هيا السبب الأساسي في حركة التوتر اللي موجودة في البورصة العالمية، ده غير الرسوم الجمركية الأمريكية اللي أقرتها البيض الأبيض واللي متوقع انها ترجع أو الإدارة الأمريكية ترجع تطبقها في أي وقت .
في سبب تاني مهم للزيادات الكبيرة اللي حصلت في أسعار الذهب، هو القرار الأخير للبنك الفيدرالي الأمريكي بخفض أسعار الفائدة والقرارات اللي متوقع صدورها في الوقت اللي جاي بخفض أسعار الفائدة، خصوصا أن الإدارة الأمريكية عندها رغبة في خفض أسعار الفائدة لاعلي نسبة ممكنة، واي خفص لأسعار الفائدة من البنك الفيدرالي الأمريكي بيكون لها تأثير علي سعر صرف الدولار، وبالتالي الناس في العالم كله بدأت تدور علي مجالات الاستثمار الأقل مخاطرة ومفيش أهل من الذهب واللي بيعتبر الملاذ الآمن.
الإقبال الكبير اللي حصل من الناس علي شراء الذهب واتجاه البنوك المركزية لتحويل جزء كبير من احتياطاتها النقدية الي ذهب كان دافع قوي للذهب علشان يحقق زيادات كبيرة في الأسعار، وبالتالي الأسعار العالمية للمعدن الأصفر ارتفعت ولسه مرشحة لزيادة جديدة في الوقت اللي جاي بسبب إستمرار جده التوترات الاقتصادية واتجاه اغلب البنوك المركزية في العالم وعلي رأسهم البنك الفيدرالي الأمريكي لخفض الفائدة.
طيب هل الوقت الحالي مناسب للشراء ولا الافضل للناس أنها تنتظر شوية يمكن الاسعار تنزل شوية ؟.
علشان تكون عارفين ان أسعار الذهب في الوقت الحالي ملهاش معيار، بمعني أنها دلوقتي مرشحة للزيادة وممكن خلال أقل من 24 ساعة تسجيل انخفاض وبارقام كبيرة وده بسبب انها مرتبطة بشكل أكبر بالتوترات الاقتصادية واللي في حالة لو الأمور استقرت والعلاقات السياسية بين الدول انحسنت فالأسعار هتكون مرشحة بشكل كبير للانخفاض .
الخبراء نصحوا المواطنين اللي عايزين يستثمروا فلوسهم في الذهب بالنزول للشراء حتي لو الأسعار مرتفعة، وده بسبب ان محدش عارف الوقت اللي جاي الدنيا فيها اية، بس بشرط أنه يحتفظ بالذهب لأطول فترة ممكنة ومش أقل من سنة، وفي حالة لو المواطن عايز فلوسه قبل كده فلازم يشوف مجال استثماري تاني غير الذهب.
الخبراء نصحوا المواطنين كمان لو عايزين يشتروا ذهب يكون سبائك بدل المشغولات، وده بسبب ان المصنعية علي السبائك سعرها منخفض جدا مقارنة بالمشغولات، ولو عايز يشتري مشغولات يبقي بلاش الحاجات اللي فيها فصوص، وكمان لما يشتري يكون من محل موثوق فيه، خصوصا أن السوق خلال الوقت اللي فات شهد حالات كتيرة للغش في الذهب، ومفيش مواطن عادي هيقدر يميز الذهب الاصلي من المغشوش الا لو كان عنده خبرة سابقة في الذهب.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
