أكد الإعلامي مصطفى بكري أن هناك تهديدات كبيرة تحيط بمصر، مشيرا إلى أن بعض المتواجدين في الداخل يساعدون في المؤامرة التي تحاك ضد البلاد.
وقال بكري خلال برنامج "حقائق وأسرار" المذاع على قناة "صدى البلد": "قالها الرئيس مبكرا أنت بتحمي شعب، بتحمي دولة، بتحمي دين، بتحمي وطن الكلام ده مش كلام إنشائي، الكلام ده كلام واقعي شفناه في البلدان اللي اتكلم عليها الرئيس عبد الفتاح السيسي وبنشوفه فيما يسمى بنظرية الفوضى الخلاقة والشرق الأوسط الجديد اللي طالع نتنياهو يبشرنا بيه".
وأضاف: "دمار في غزة، دمار في الضفة الغربية، دمار في لبنان، احتلال لأراضي سورية، معارك في كل المنطقة، خريطة جديدة للشرق الأوسط، خريطة لا تستثني أحد من العرب، ولا حتى تستثني سيناء، ولا تستثني حتى مقدساتنا".
وتابع: "ده نتنياهو ودي إسرائيل ودي الولايات المتحدة الأمريكية، اللي مش قادرة النهارده مخطط الإبادة بيدمر، بيشق قلوبنا كل يوم، مافيش حد قادر يقول لهم اقفوا، مافيش حد قادر يلمهم الموت، الدمار، الأطفال، البيوت اللي بتهدم على ساكنيها، الناس الجوعى".
وواصل: "صوت مصر اتنبح، وآخرين، لكن مافيش صدى للصوت، مافيش حد بيستجيب. عالم فقط، قيمة أخلاقية؟ مين يقدر يكلمنا عن حقوق الإنسان دلوقتي؟ أي حقوق إنسان بيتكلموا عليها؟ نحن في زمن البلطجة والتآمر على الأمة وحتى على القيم الإنسانية".
وأوضح: "دي الحقيقة، لازم نقرأ الواقع، ما تاخدناش المشاكل الصغيرة آه زعلانين، آه مكبوتين، آه عايزين وعايزين وعايزين، لكن ما تنسوش إن ده الوطن النهارده".
وأكمل: "أنا بتكلم، وبتكلم بحرقة من جوايا عشان شايف المؤامرة على بعد خطوات، وشايف إن هناك تخطيط من خارج البلاد للفوضى، والتآمر على الدولة، ونظام الحكم، على الشعب، ومؤسسات الدولة عايزين يشعلوها حرب أهلية، عايزين ينالوا من الجيش والشرطة، بيتلككوا، وللأسف للأسف للأسف بعض الحمقى هنا بيساعدوهم، بيعملوا أبطال على حساب البلد".
وواصل: "لما يخرج واحد كل يوم بيشككنا في ديننا، ويقف جنب إسرائيل ضد المقاومة، ويرتكب كل العيوب اللي في الدنيا، ويصبح مجرد بوق لأهداف الخارج، وييجي النهارده مالهوش قضية غير التحريض ضد البلد ونظام الحكم ده مش بطولة، ولا ترند، ده إرضاء لأسيادك برّه، للأجندة اللي انت شايلها على كتفك، لمزيد من المكاسب أمثال هؤلاء لازم يتواجهوا بكل قوة عمركم ما هتكونوا طليعة، ولا قيادة للناس عشان تمشوا وراكم، زي ما كنتوا مع البرادعي، وزي ما كنتوا مع الإخوان قبل كده، وغيره، الناس عرفت الصح من الغلط".
