يا ترى إمتى هنشوف أول موبايل مصري 100% من غير ما نعتمد على مكونات مستوردة؟، وهل ممكن مصر تتحول لمركز إقليمي يصدر موبايلات لإفريقيا والشرق الأوسط بدل ما نستورد؟.. ويا ترى وجود مصانع زي سامسونج وأوبو وشاومي هنا، هل ده بداية إننا نصدر من مصر للعالم؟
تخيلوا معايا شكل السوق المصري للموبايلات وهو بيتغير قدام عنينا.. تقرير جديد من مؤسسة عالمية اسمها فيتش سوليوشنز، بيأكد إن سوق الموبايلات في مصر ماشي بخطوات سريعة جدًا ناحية النمو، والفضل الكبير بيرجع للسياسات الحكومية اللي شجعت على توطين صناعة الإلكترونيات.
التقرير بيقول إن قيمة مبيعات الموبايلات في مصر اللي دلوقتي حوالي 2.5 مليار دولار، هتوصل في سنة 2031 لـ 4.8 مليار دولار، وده بمعدل نمو سنوي أكتر من 11%، ودي أرقام تخليك تحس إن مصر دخلت فعلاً على فصل جديد في مجال الصناعات التكنولوجية.
طب إيه السبب؟.. الدولة بقالها كام سنة شغالة على مبادرات زي "مصر تصنع الإلكترونيات"، اللي من خلالها قدموا حوافز للمستثمرين، وخففوا أعباء ضريبية على مدخلات التصنيع، كمان في 2022 الحكومة زودت الرسوم الجمركية على الموبايلات المستوردة لـ 10%، وده خلى التصنيع المحلي يبقى منافس قوي.
وبالفعل بقينا نشوف مصانع ضخمة هنا في مصر بتجمع وتنتج موبايلات لشركات عالمية كبيرة زي سامسونج وأوبو وشاومي وفيفو وإنفينيكس ونوكيا ومايكرومكس، حتى الشركة المصرية "سيكو" كانت البداية بهاتف "نايل إكس"، ومن وقتها الإنتاج بيتضاعف.
يعني مثلا بصوا للأرقام في 2019 الإنتاج كان محدود جدًا، في 2021 بقينا عند 1.5 مليون جهاز، في 2022 وصل لـ 2 مليون موبايل، وفي 2024 اتجاوزنا 3 مليون جهاز سنويًا، وفي نفس الوقت واردات الموبايلات نزلت بشكل حاد من 1.8 مليار دولار في 2020، لـ54 مليون دولار بس في 2024، وده معناه إننا بدل ما نستورد جهاز كامل، بقينا نستورد المكونات ونجمعها هنا.
الأحسن من كده أن المصانع عندها قدرة إنتاجية توصل لـ 11.5 مليون موبايل في السنة، لكن لحد دلوقتي بنستغل حوالي ربع الرقم ده بس، يعني لسه عندنا فجوة ضخمة وفرص استثمارية مفتوحة سواء للتصدير أو لتغطية الطلب المحلي اللي بيزيد يوم بعد يوم.
التقرير كمان وضّح أن في تحديات، زي إن لسه بنعتمد على استيراد بعض المكونات الأساسية، وإن محتاجين عمالة مدربة أكتر في مجال الإلكترونيات، غير طبعًا المخاطر اللي ليها علاقة بالوضع الاقتصادي العالمي وسعر الصرف.
لكن الأكيد إن لو اتعالجت التحديات دي، مصر عندها فرصة تكون مركز إقليمي لتصنيع الموبايلات، مش بس عشان تخدم السوق المحلي، لكن كمان تبقى بوابة لأسواق إفريقيا والشرق الأوسط.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
