كهرباء مصر هتوصل لكل دول العالم في افريقيا وآسيا وأوروبا.. ياتري اية حكاية الموضوع ده .. وهل دولة زي مصر كانها مشاكل في توفير الاحتياجات المحلية هتصدر للدول التانية.
توفير الكهرباء وتحويل مصر لمركز إقليمي لتبادل الطاقة واخد من اهم الأهداف اللي الحكومة شغالة عليها في الوقت الحالي، خصوصا أن مصر قدرت خلال الكام سنة اللي فاتت أنها تطور البنية التحتية في قطاعات الكهرباء والطاقة المتجددة من الف للياء، وده مكن الشبكة الموحدة للكهرباء أنها تستوعب قدرات كهربائية اول مرة توصل لها في التاريخ، وده اللي حصل في فصل الصيف الحالي لما الشبكة تحملت أحمال وصلت لـ 40 الف ميجاوات وده اعلي حمل سجلته الشبكة علي مدار تاريخها.
طيب اية حكاية تصدير مصر للكهرباء لدول قارة آسيا وأوروبا وأفريقيا ؟.
في الوقت الحالي مصر بدأت تبني شبكة خطوط كبيرة من دول مختلفة في قارات آسيا وأفريقيا وأوروبا والخطوط دي هدفها تصدير الكهرباء للخارج.
طبعا اول ما انت سمعت الكلمتين دول جه سؤال في بالك ازاي هنصدر كهرباء واحنا الكهرباء بتقطع عندنا بالساعات، بس لازم نعرف أن مصر مفيهاش اي تخفيف للاحمال ولا قطع كهرباء ناتج عن زيادة الاحمال علي الشبكة، وفي حالة لو في اي قطع للكهرباء بيكون ناتج عن أعمال صيانة أو اعطال وده وارد يحصل في كل دول العالم علي فكرة.
لازم نكون عارفين ان البنية التحتية من محطات توليد الكهرباء اللي موجودة حاليا قادرة علي إنتاج أكثر من 60 ألف ميجاوات وده اعلي باكثر من 20 ألف ميجاوات من اكبر نتيجة للاحمال الكهربائية اللي سجلناها علي الشبكة لحد الساعة دي وكان في فصل الصيف الحالي، وفي فصل الشتاء الاحمال بتخفض بشكل كبير ومش بتسجل أكثر من 30 الف ميجاوات وبالتالي هيكون عندنا أكثر من 30 الف ميجاوات ممكن نصدرها بالدولار ونستفاد منها كايرادات في الناتج القومي المصري.
فكرة الاستفادة من الطاقة الزيادة عن الاستهلاك دي اللي الحكومة اشتغلت عليها وكمان فتح الباب قدام شركات القطاع الخاص للدخول ومشاركة الحكومة في زيادة إنتاج الكهرباء بس المرة دي مش من محطات توليد الكهرباء العادية وهيكون من مصادر الطاقة الجديدة والمتجددة زي الشمس والرياح خصوصا أن مصر ربنا عطاها مساحات كبيرة ممكن الدولة تستغلها في زيادة إنتاج الطاقة.
خلال الفترة اللي فاتت القطاع الخاص قدر يضيف اكثر من 2000 ميجاوات طاقات متجددة من الشمس والرياح، وبالتالي بقي عندها فائض كبير للتصدير، وبالتالي الدولة بدأت تعمل خطوط ربط كهربائي مع ليبيا والسودان في قارة أفريقيا ومع السعودية في قارة آسيا ومع اليونان وقبرص في دولة اوروبا والدولة دي هتكون بداية لخطوط ربط كبيرة مع دول أكثر في ال 3 قارات والخطة اللي جاية أنه هيتم مد خطوط نقل الكهرباء للدول المستهدفة وتصدير الكهرباء من خلالها وده هيكون مصدر مهم جدا للدولار في الناتج القومي من تصدير الكهرباء.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
