أسئلة كتير بتدور في بال كل واحد بيتابع أسعار الدهب كل يوم.. خصوصاً بعد ما الأرقام كشفت عن مفاجأة من العيار التقيل.. مشتريات المصريين من سبايك الدهب زادت أكتر من 25% في 3 شهور بس.. فيا ترى ليه المصريين بيشتروا سبايك دهب أكتر من الأول؟ وليه رغم إن الجنيه سعره بيتحسن قدام الدولار الناس بتجري على الدهب؟ هل الدهب دلوقتي هو أفضل استثمار في مصر؟
من فترة قريبة.. كان الكلام كله عن قوة الجنيه.. وإن البنوك العالمية بتتوقع إنه هيواصل الارتفاع.. لكن المصريين كان ليهم رأي تاني.. ورغم التوقعات الإيجابية.. إلا إنهم قرروا يرجعوا للدهب تاني.
وفقاً لبيانات مجلس الدهب العالمي.. مشتريات المصريين من السبائك والعملات الدهبية وصلت لـ5.9 طن في الربع التاني من السنة دي.. وده رقم كبير جداً.. خصوصاً لو قارناه بالربع الأول.. اللي كانت فيه المشتريات 4.7 طن.
طب إيه سبب الإقبال الكبير على الدهب؟
الموضوع ليه أسباب كتير.. أهمها إن الناس لسه قلقانة من أي تذبذبات ممكن تحصل في سعر الدولار.. ورغم إن الجنيه بيتحسن.. لكن الأزمة اللي فاتت لسه سايبة أثرها في نفوس الناس.
كمان.. فيه سبب تاني.. وهو إن فيه توقعات كبيرة.. إن الفيدرالي الأمريكي هيخفض الفايدة الشهر الجاي.. ولو ده حصل.. سعر الدهب العالمي هيرتفع بشكل كبير.. والمصريين عايزين يستغلوا الفرصة دي.. ويشتروا دهب قبل ما سعره يرتفع.
لكن.. في نفس الوقت.. لازم نكون واقعيين.. فيه عوامل تانية ممكن تأثر على سعر الدهب في مصر.. زي استقرار الجنيه اللي لسه البنوك العالمية زي "جولدمان ساكس" بتتوقع إنه هيستمر.. وده ممكن يخلي سعر الدهب المحلي ما يرتفعش بنفس قوة الارتفاع العالمي.
كمان.. لازم ناخد بالنا من نقطة مهمة جداً.. وهي إن مبيعات الدهب في مصر في الربع التاني.. قلت بنسبة 23% لو قارناها بنفس الفترة السنة اللي فاتت.. وده بيأكد إن الناس لسه مترددة.. ومبتخاطرش زي الأول.
اللى بيحصل بيقول حاجة واحدة .. وهي ان الدهب لسه هو الملاذ الآمن المفضل عند المصريين.. وارتفاع المشتريات من السبائك والعملات.. بيأكد إن فيه شريحة كبيرة من الناس.. بتفضل إنها تحول فلوسها لدهب.. بدل ما تسيبها في البنوك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
