حل الفنان كريم فهمي ضيف على برنامج كلام نواعم وذلك بعد تألقه الكبير في مسلسل 220 يوم والذي تم عرضه على منصة شاهد الإلكترونية في الايام الماضية، محققا الاعلى مشاهدة على المنصة، وشارك في بطولته أيضا الفنانة صبا مبارك.
كريم فهمي عن مسلسل 220 يوم
وقال كريم فهمي في تصريحات رصدها موقع تحيا مصر عن مسلسل 220 يوم: المسلسل دا عملي كوابيس ولحد النهاردة بصحى من النوم في كوابيس رهيبة لأني قعدت سنتين أو أكتر شغال عليه تعبني نفسيا جامد من أول الكتابة لحد ما خلصنا تصوير.
وتابع حديثه، قائلا: المسلسل قصة حب بين أحمد ومريم وأصعب حاجة في صناعة عمل أن الشرير بتاعة العمل أنت مش عارف تمسكه بإيدك لأنه "المرض" هو دا صعوبة المشروع دا بالذات، البطل مرضيش يقول لمراته لأنها كان عندها حلم بقالها 7 سنين نفسها تخلف ولما بقت حامل اكتشف أنه مريض، دي كانت ظروفه قرر ميقولهاش، ربنا يبعد عننا.
كريم فهمي: الحب مع الشريك اللي معاك بيختلف مع الوقت
وتحدث كريم فهمي عن الحب، قائلا: الكلام عن الحب مع الشريك اللي معاك بيختلف مع الوقت والخبرة والرحلة اللي بتعيشوها مع بعض ومع الحياة والصعوبات بيختلف عن لما تكونوا بتتعرفوا على بعض، أنا دلوقتي بحبك بشكل تاني خالص، شكل أحلى بكتير من الأول.
وعن اخفاء مرضه عن زوجته في مسلسل 220 يوم، قال: في اللحظة دي مش فاكر إن كان حصل وخبيت عليها لكن أنا ذاكرتي ضعيفة دايما لما بيكون في حاجة بحكيها لمراتي لأنها هي اللي هتشيل المعلومة، على المستوى الشخصي أنا بحب المشاركة، الصراحة مهمة لأن الزوجين بقوا واحد في كل حاجة أنا بحب دايما أن كل الحاجات اللي ممكن تكون بتحصل على مستوى الشغل والحياة اليومية اللي ينفع تتقال بقولها على طول، ودا بالنسبالي لأن كل واحد حياته وظروفه مختلفة، أنا راجل مش بعرف أعمل غير شغلي وهي قايمة بباقي الحاجات.
كريم فهمي: أنا الحب الأول في حياة بناتي وانفصال أهلي خلاني أعتمد على نفسى
وتابع كريم فهمي: أنا الحب الأول في حياة بناتي، وأتمنى يلاقوا الحب الأكبر في حياتهم قدام، ودانيا مراتي هي اللي بتخلي فيه توازن في حياتنا، بين الحياة الاجتماعية والعملية.
وكشف عن تأثير انفصال أهله عليه، قائلا: انفصال أهلي وأنا عندي 16 سنة هو اللي كوّن شخصيتي، وخلاني أعتمد على نفسي وعرفت قيمة القرش أكتر، ساعتها ممكن تكون أوحش حاجة حصلتلي، بس لما كبرت عرفت إنها أهم حاجة حصلتلي وممتن لأهلي على الانفصال اللي خلاني معتمد على نفسي كدة.
