يا ترى البنك المركزي بيعمل إيه؟ وهل قراره بخفض الفايدة علامة على إن الدولار هينزل والدهب سعره هيتغير؟ وإيه اللي بيحصل في السوق دلوقتي.. وإزاي القرار ده ممكن يأثر على كل جنيه في جيبك؟
من ساعات البنك المركزي أخد قرار مهم جداً.. قرار خفض الفائدة بنسبة 2% على الإيداع والإقراض.. اللي هيخلّي سعر الإيداع 22% و23% على الترتيب... يمكن الأرقام دي تبدو معقدة.. لكن تأثيرها بسيط ومباشر..
طيب.. إيه معنى القرار ده أصلاً؟
البنك المركزي بيحاول يوجه رسالة واضحة للسوق.. وهي إن التضخم ابتدى يسيطر عليه.. وإننا ماشيين في الطريق الصح.. وده اللي بيشجع المستثمرين على إعادة النظر في استثماراتهم.
طب ايه تأثير القرار على الدولار والدهب؟
نبدأ بالدهب.. الدهب دايماً بيُعتبر ملاذ آمن.. الناس بتلجأله في أوقات التضخم والأزمات الاقتصادية.. لإن قيمته ثابتة.. أو بتزيد.. لكن لما البنك المركزي يقلل الفائدة.. ده معناه إن فيه بدائل استثمارية تانية ممكن تكون جذابة أكتر.. زي الاستثمار في أوراق الدين الحكومية.. أو حتى البورصة..
بس لازم نكون واضحين.. خفض الفايدة مش لوحده هو اللي بيحدد سعر الدهب.. فيه عوامل تانية كتير.. زي سعر الدولار العالمي.. والأوضاع السياسية والاقتصادية العالمية.. عشان كده.. توقعات الخبراء بتقول إن خفض الفايدة ممكن يقلل من جاذبية الدهب على المدى القصير.. بس لو الأوضاع الاقتصادية العالمية متقلبة.. الدهب هيفضل محتفظ بقيمته وممكن يزيد كمان..
أما بالنسبة للدولار.. فالعلاقة هنا معقدة شوية.. خفض الفائدة عادة بيقلل من جاذبية العملة المحلية.. لإن العائد على الإيداع فيها بيقل.. وده ممكن يخلي بعض المستثمرين الأجانب يتخارجوا من السوق المصري.. وده ممكن يزود الطلب على الدولار.. وبالتالي يرفع سعره
لكن على الجانب التاني.. خفض الفائدة ممكن يشجع الاستثمار المحلي.. وده ممكن يزود الإنتاج والصادرات.. وبالتالي يوفر عملة أجنبية أكتر في السوق.. وده ممكن يقلل الطلب على الدولار على المدى الطويل..
طب ايه تأثير القرار على مناخ الاستثمار؟
هنا بقى النقطة الأهم.. خفض الفائدة يعتبر رسالة إيجابية جداً للمستثمرين.. سواء محليين أو أجانب.. لإن ده بيقلل من تكلفة الاقتراض.. وبالتالي بيشجع الشركات على التوسع في مشروعاتها.. وده بيخلق فرص عمل جديدة.. وبيزود الناتج المحلي..
الشركات اللي كانت مترددة في أخذ قروض للتوسع.. دلوقتي هتكون متحمسة أكتر.. لإن القروض هتكون أرخص.. وده هيحفز النمو الاقتصادي بشكل كبير.
المؤكد ان قرار خفض الفائدة هو خطوة استباقية من البنك المركزي.. عشان يحرك عجلة الاقتصاد.. ويقلل من الضغوط التضخمية.. تأثير القرار ده على الدهب والدولار مش هيكون مباشر وسريع.. لكنه بيفتح الباب لفرص استثمارية جديدة.. وبيبعت إشارة إيجابية جداً عن مستقبل الاقتصاد المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
