زيادات جديدة في أسعار الذهب.. والسبب أسعار الفائدة.. إيه الحكاية

أسعار الذهب رجعت ترتفع تاني بعد فترة طويلة من الاستقرار النسبي.. ياتري اية سر ارتفاعات أسعار الذهب.. وامتي الأسعار هتستقر بشكل نهائي .. وهل خفض الفائدة الأخيرة هيكون له تاثير علي الأسعار .

من بداية 2025 هيا بتشهد تحديات وتغيرات اقتصادية كبيرة وكان الانعكاس بتاعها الأكبر علي الأسعار واللي بسببها حصلت تغيرات في البورصة الدولية في أغلب الأسعار، خصوصا أسعار الذهب واللي من بداية السنة ومحدش عارف لها حل وكل يوم الذهب بسعر جديد يوم في الطالع والتاني في النازل وفي أيام قليلة قوي كانت مستقرة.

التغيرات والتحديات العالمية خلت في تخوف كبير عند اغلب الدول عن عدم استقرار العملات الأجنبية وده اللي دفع اغلب البنوك المركزية في العالم كله لتحويل جزء كبير من احتياجاتها النقدية الي سبائك ذهبية خصوصا أن الذهب علي مر العصور اللي فاتت وهو محتفظ بقيمه وبرغم كل التغيرات والتحديات اللي حصلت في العالم كله فضل هو متمسك بسعره وقيمته .

طيب اللي خلي أسعار الذهب عندنا في مصر ترتفع وتخفض بشكل دائم وأمتي الذهب هيستقر في مصر ؟

أسعار الذهب عندنا في مصر مرتبطة بالسعر العالمي واللي لما يرتفع الأسعار اتوماتيك عندنا في مصر بترتفع والعكس صحيح، ولان سعر المعدن الأصفر ارتفع بشكل كامل في العالم كله الأسعار عندنا في مصر وصلت لارقام غير مسبوقة، خصوصا أن سعر الاونصة وصل برضوا لارقام غير مسبوقة لما سجلت 3500 دولار وده اعلي رقم وصلت له سعر الاونصة علي مر التاريخ.

التغيرات العالمية في أسعار الذهب واللي انعكست علي الأسعار في مصر خلت أسعار الذهب في مصر خصوصا عيار 21 واللي هو الأكثر مبيعا وانتشارا في مصر ترتفع لارقام غير مسبوقة لما سجلت أكثر من 5 آلاف جنية للجرام وده اعلي سعر وصلت لأسعار الذهب علي مدار التاريخ.

في سبب مهم جدا كان له دور كبير في التغيرات اللي حصلت في اسعار الذهب في مصر وهيا التغيرات المتتالية في أسعار الفائدة والصرف خصوصا أن البنك المركزي بدأ يأخذ اتجاه جديد لخفض أسعار الفائدة واللي كان آخرها القرار اللي صدر من كام ساعة بخفض أسعار الفائدة في مصر 200 نقطة أساس وكل التوقعات حاليا بتاكد أنه هيكون في زيادة جديدة في أسعار الذهب في مصر خصوصا أن خفض أسعار الفائدة هيخلي في اقبال كبير من الناس علي سحب فلوسها من شهادات الاستثمار والاتجاه للاستثمار في للذهب.