المصريين في الخارج.. مش مجرد مغتربين بيبعتوا فلوس لأهلهم.. دول دلوقتي بقى ليهم دور رئيسي في إنقاذ الاقتصاد المصري.
الأرقام الأخيرة من البنك المركزي بتقول إننا قدام أعلى تدفقات تحويلات في تاريخ مصر.. والأهم إن التحويلات دي جاية من قنوات رسمية.
الأرقام دي مجتش بالصدفة، إنما بفضل قرارات جرئية منها تحرير سعر الصرف ومبادرات جديدة موجهة خصيصًا للمصريين بالخارج، ده طبعًا غير الدور الوطني لأبنائيا في الخارج ودعمهم لاقتصاد مصر.
البنك المركزي أعلن إن تحويلات المصريين العاملين بالخارج سجلت أرقام قياسية بنسبة زيادة وصلت إلى 66%.
وبلغت قيمة التحويلات دي خلال السنة المالية 2024/2025 إلى 36.5 مليار دولار مقابل 21.9 مليار في 2023/2024.
وفي الربع الأخير من العام المالي (أبريل – يونيو 2025) التحويلات سجلت 10 مليارات دولار بزيادة 34.2% عن نفس الفترة 2024.
كمان شهر يونيو 2025 لوحده كان "تاريخي": سجل 3.6 مليار دولار، أعلى مستوى شهري على الإطلاق، بارتفاع 40.7% عن يونيو 2024.. ده بيأكد إن الثقة رجعت للبنوك الرسمية، وإن السوق السوداء انهارت بعد قرارات التعويم.
تحرير سعر الصرف
في مارس 2024، البنك المركزي حرر سعر الصرف بالكامل ورفع الفائدة 600 نقطة أساس، والنتيجة: السعر الرسمي بقى قريب من السوق الفوري، وبالتالي ما بقاش فيه حافز للتحويل خارج البنوك.
القرار ده مع الرقابة على السوق السوداء خلّى المصريين بالخارج يحولوا عبر البنوك الرسمية بأمان، وده انعكس في القفزة القياسية للتحويلات.
ده كمان بخلاف التسهيلات اللي بتقدمها البنوك الرسمية للتحويل وخفض قيمة المصروفات.. مش بس سعر الصرف كان وراء التحويلات في كمان مبادرات كتيرة أطلقتها الحكومية، ودي ربطت المصريين بالخارج مع وطنهم.
الحكومة أطلقت 3 مسارات أساسية للمصريين في الخارج، في مقدمتها مبادرة السكن – "بيتك في مصر"، واللي وزارة الإسكان أعلنت عن الطرح الأول في المرحلة الثانية من المبادرة واللي هيكون 30 أغسطس 2025، لغاية 4 سبتمبر.
الطرح الجديد يتضمن 1380 وحدة في البداية، والمرحلة الثانية كاملة هتطرح حوالي 3000 وحدة سكنية وتجارية وإدارية موزعة على مدن جديدة زي: القاهرة الجديدة، العلمين الجديدة، دمياط الجديدة، أكتوبر الجديدة، المنصورة الجديدة، بدر، العبور الجديدة.
وطبعًا في مزايا كتير للمصريين بالخارج منها:
• تسهيلات سداد لغاية 10 سنوات.
• خصومات لغاية 7%.
• جدية حجز 5 آلاف دولار تدفع إلكترونيًا من أي مكان.
• إمكانية معاينة الوحدات بتقنية 360 درجة عبر موقع المبادرة.
* الهدف: توفير استثمار آمن وتعزيز ارتباط المصريين بالخارج بالوطن.
من ضمن المبادرة اللي اطلقتها الحكومة كمان سيارات المصريين بالخارج، ودي بستهدف استيراد سيارات بدون جمارك أو ضرائب مقابل وديعة بالدولار تسترد بعد 5 سنوات. والمبادرة دي جذبت آلاف المصريين وساهمت في تدفقات مليارية على النظام المصرفي.
كمان عندك الشهادات الدولارية.. البنوك المصرية طرحت شهادات ادخار بالدولار بعوائد وصلت لـ 7 – 9% سنويًا. والشهادات دي وفّرت للمغتربين فرصة استثمارية آمنة، وخلّت البنوك تجمع مليارات من العملة الصعبة.
اللي بيحصل النهارده مع المصريين في الخارج مش مجرد تحويلات… دي شراكة اقتصادية كاملة.. واللي حصل في التحويلات إنجاز تاريخي ورسالة ثقة إن الاقتصاد المصري قادر يرجع يقف على رجليه.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
