يا ترى إيه خطة الحكومة ممثلة في وزارة البترول عشان تزود إنتاجنا من الدهب وتحقق اكتفاء ذاتي من الثروات المعدنية، وإيه اللي بيحصل في الكواليس عشان نوصل للهدف ده وفي أسرع وقت ممكن؟
في الساعات الأخيرة، المهندس كريم بدوي وزير البترول حضر الجمعية العامة لشركة شلاتين للتعدين، واللي كشف فيها عن إن إجمالي إنتاج الشركة من الدهب وصل أكتر من 900 كجم خلال السنة دي، سواء من منجم إيقات أو منظومة التعدين الأهلي.
والمفاجأة هي إن الشركة عندها خطة لرفع الإنتاج لحد حوالي 6 طن خلال 5 سنين بس، وده كله من عمليات التنقيب المستمرة عن الدهب.
وبخصوص المشاريع الجديدة، فالوزارة شغالة دلوقتي على المجمع الصناعي بدهميت في أسوان على مساحة 1422 فدان، والهدف منه تنظيم التعدين العشوائي وتشغيله بطريقة علمية وصديقة للبيئة وكمان الدراسات مستمرة عشان يزودوا ويأكدوا احتياطي الدهب والمعادن في منطقة غرب جبل علبة بالتعاون مع شركة آفاق للتعدين، واللي ممكن يزيد على 300 ألف أوقية وده تمهيد لإعلان كشف تجاري جديد قريب جدا.
كمان، المهندس أمجد غنيم رئيس شركة واديكو، عرض خطة الشركة لتعظيم الاحتياطي والقيمة المضافة من خامات التعدين زي مثلا خام الفوسفات، ونجحوا خلال السنة دي في انهم يضيفوا 5.4 مليون طن احتياطي جديد، وكمان هما شغالين دلوقتي على مشروع عشان يرفع جودة خامات الفوسفات منخفضة ومتوسطة الجودة، بحيث يضاعف المخزون عالي الجودة بنسبة توصل ل200%، وده هيأهلهم للدخول في شراكات لإنتاج الأسمدة الفوسفاتية.
وعشان كل ده يكون صديق للبيئة، فللشركة هتطلق أول كسارة فوسفات صديقة للبيئة في موقعها بأسوان، وكمان هتشغل خطوط الإنتاج بالطاقة الشمسية وده هيوفر حوالي مليون لتر سولار سنويا.
يعني باختصار، الحكومة مش بس بتتكلم على زيادة إنتاج الدهب لأ ده كمان في خطة واضحة بتجمع بين التعدين العلمي زيادة الاحتياطي، وكمان في مشاريع صديقة للبيئة وفي تنمية القيمة المضافة من خامات المعادن، وكل ده هدفه تعزيز الاقتصاد المصري ودخول عملة صعبة للبلد.
بردو، وزارة البترول مش واقفة عند إنتاج الدهب بس، لأ ده كمان مهتمة بتدريب ودعم صغار المعدنين وتشجيعهم على الالتزام بالطرق العلمية، يعني بدل التعدين العشوائي اللي بيضر البيئة وبيقلل من الإنتاجية،وده معناه إن في فرص عمل جديدة وتحسين دخل المجتمعات المحلية في أسوان والمناطق المحيطة.
كمان، الوزارة بتردس استخدام التكنولوجيا الحديثة والذكاء الاصطناعي في عمليات التعدين، زي مثلا رصد الاحتياطيات وحتى عمليات المعالجة والاستخلاص، وده هيساهم في رفع كفاءة الإنتاج وتقليل الهدر بشكل كبير.
وفي الآخر، نقدر نقول ان كل الخطوات دي بتمثل جزء من استراتيجية الدولة لتعظيم الاستفادة من الثروات الطبيعية، مش بس من ناحية الإنتاج لكن كمان من ناحية الاستثمار وتوفير عملة صعبة وتنمية المجتمعات المحلية، وكمان حماية البيئة بحيث مصر تقدر تحقق أعلى قيمة ممكنة من الدهب والمعادن خلال السنين الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
