مش هيكون في دعم تمويني تاني، واللي جاي هيكون دعم نقدي .. ياتري اية حقيقة الكلام ده .. وهل الدولة عايزة تقطع التموين علي الناس .. وآية اللي هيحصل بعد كده.
في الفترة الحالية الحكومة بتعمل خامة اسمها تقنين الدعم وده معناه توصيل الدعم للمستحقين خصوصا أن في نسبة كبيرة من الشعب للاسف بيأخذوا سلع تموينية وهما غير مستحقين وفي نفس الوقت في فئات كتيرة من الشعب مش بيأخذوا اي سلع وهما في اشد الاحتياج، ده غير أن في إساءة كبيرة من الشعب للتعامل مع صرف المقررات التموينية.
طيب اية اللي بتعمله الحكومة علشان تقنن صرف السلع التموينية للمستحقين ؟.
رئيس الوزراء مصطفى مدبولي أعلن أن الحكومة تستهدف بدء تجربة الدعم النقدي في بعض المحافظات زي بورسعيد بداية من العام المالي الحالي واللي بدأ من شهر يوليو 2025، لتحويل دعم السلع التموينية الي دعم نقدي وكل فرد في بطاقات التموين هياخذ دعم نقدي هيوصل ل300 جنيه شهريا منهم 200 جنيه للسلع التموينية و100 جنيه للخبز .
قبل ما الحوطة تقر العمل بالمنظومة الجديد للتحول من الدعم التمويني للدعم النقدي، كان في حوار وطني أطلقته الحكومة علشان يتم التوصل لاتفاق سياسي ومجتمعي لشكل وتنفيذ التحول، والهدف من التحول من هو تقليل الفساد والتلاعب المرتبط ببطاقات التموين، وتوجيه الدعم للمستحقين بدقة.
الحكومة في الفترة الحالية بدأت بالبلدي كده تجرب الخطة في بعض المحافظات، وبدأت تجهز نفسها لتعميم الخطة من خلال بناء قاعدة بيانات دقيقة، استخدام البنوك والمحافظ الإلكترونية، وتدريب المستفيدين على استخدام النظام الجديد.
التوجه الجديد بيشمل إلغاء تدريجي الدعم العيني زي السكر والزيت من بطاقة التموين بداية من يوليو 2025 مع إسناد الدعم النقدي من خلال كارت مسبق الدفع بيستخدم في شراء السلع والأسعار هتكون أكثر واقعية يعني مثلا رغيف الخبز هيكون سعره بالسعر العادي دلوقتي في السوق الحر .
التوجه الجديد للتحول من دعم السلع التموينية الي دعم نقدي جاي في إطار خطة الدولة لرفع الدعم واللي ماشي في كل القطاعات كجزء من التزام مصر بإصلاحات صندوق النقد الدولي، وتقليص الدعم التدريجي لتحرير الأسعار.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
