إزاي تحمي فلوسك في زمن التضخم؟.. هل الفضة خيار مناسب دلوقتي؟

يا ترى في زمن التضخم وإرتفاع الأسعار إزاي ممكن تحافظ على فلوسك وتخلى قيمتها ما تروحش مع الوقت، وهل الفضة دلوقتي تعتبى اختيار ذكي زي الدهب ولا لأ؟

في الحقيقة، رغم إن سعر الفضة عالميا نزل الأسبوع اللي فات حوالى 1%، لكن في السوق المحلي عندنا الأسعار فضلت مستقرة، يعني جرام الفضة عيار 925 بقى حوالى 59 جنيه وعيار 999 وصل ل 64 جنيه والجنيه الفضة عيار 925 بقى فى حدود 474 جنيه.

والكلام ده معناه ان وقت الأزمات والتضخم الناس بتسيب الاستثمارات الكبيرة وتتجه للإنفاق على حاجات صغيرة يعني حاجات بتديهم سعادة لحظية لكن على المدى الطويل الفلوس بتتبخر، وده اللي بيخلى الاستثمار في الفضة أو الدهب أذكى بكتير. لانك بدل ما تشترى حاجة قيمتها بتنزل مع أول استخدام فبتشتري أصل يقدر يحافظلك على قيمة فلوسك.

والميزة التانية في الفضة، إن أسعارها لسه فى مستوى أقل من الدهب بكتير، وده بيخليها مناسبة للناس اللي عايزة تبدأ تستثمر بمبالغ صغيرة، يعني مش شرط يبقى معاك عشرات الآلاف عشان تبدأ فممكن تشتري فضة بمبلغ قليل وتبني استثمارك مع الوقت.

كمان، الفضة ليها استخدامات صناعية كبيرة جدا زي الالكترونيات والطاقة الشمسية، وده بيخلي الطلب عليها مش بس استثماري لكن كمان صناعي وده بردو عنصر أمان ممكن يخليها محتفظة بقيمتها على المدى الطويل.

بس لازم ناخد بالنا إن الفضة أكتر تقلبا من الدهب، يعني ممكن تطلع وتنزل بسرعة عشان كده الصح إنك تحط جزء صغير من استثماراتك فيها مش كل فلوسك، والأفضل إنك توزع بين دهب وفضة عشان توازن المخاطر وتستفيد من الميزة بتاعة الاتنين.

والأهم من كده، إنك ما تسيبش نفسك للإنفاق العشوائي اللي بيحصل في أوقات التضخم لان من غير خطة واضحة فأي فلوس هتتبخر في الكماليات اللي مالهاش عائد، فلازم وجود هدف مالي واستثمار في أصول زي الدهب والفضة اسات يخلي عندك شبكة أمان حقيقية ضد تقلبات السوق.

والخلاصة هي ان الفضة ممكن تبقى خيار ذكي دلوقتي خاصة للناس اللي عايزة تبدأ تستثمر بمبالغ صغيرة، بس النصيحة الذهبية إنك توازن بين الدهب والفضة وتخلى جزء من دخلك كل شهر رايح للاستثمار، لان في زمن التضخم اللي ما بيحافظش على فلوسه صح بيخسر قيمتها يوم ورا التاني.