يا ترى إيه اللي خلّى أسعار الذهب في مصر تنزل فجأة النهاردة؟ .. وليه السوق بقى زي الملاهي .. ساعة فوق وساعة تحت؟ .. وإزاي تصريحات ترامب عن رئيس الفيدرالي الأمريكي وأخبار اتفاق تجاري مع الصين قلبوا الموازين؟ .. لو عايز تعرف السر ورا اللي بيحصل في سوق الذهب .. وإزاي كل ده بيأثر على جيبك.
النهاردة الأربع 23 أبريل 2025 .. وأسعار الدهب في مصر شهدت هبوط ملحوظ .. عيار 21 اللي هو الأكثر تداول عندنا .. نزل لحوالي 4800 جنيه للجرام بعد ما كان قرب الـ 5 الاف جنيه من كام يوم بس .. وده تراجع مش بسيط .. خصوصًا لو بصينا على الارتفاعات القياسية اللي كانت بتحصل في الأسعار الفترة اللي فاتت.
طيب .. إيه السبب؟ .. وإزاي كلام ترامب وأخبار الصين ليهم يد في اللي بيحصل؟
لازم نفهمها إن الدهب مش مجرد معدن بنشتريه عشان الخطوبة أو الزفاف .. لا .. الدهب في الأسواق العالمية بيتصنف كـ"ملاذ آمن" .. يعني لما الدنيا بتبقى مضطربة اقتصاديًا أو سياسيًا .. الناس بتجري تشتري دهب عشان تحافظ على فلوسها .. بس لما الأوضاع بتهدى .. أو بيبقى فيه أخبار إيجابية في الأسواق .. الدهب بيخسر جزء من جاذبيته .. وده اللي حصل النهاردة.
نيجي بقى للحدث الرئيسي .. تصريحات دونالد ترامب .. الرئيس الأمريكي اللي كل كلمة بيقولها بتقلب الأسواق .. امبارح التلات .. ترامب خرج وقال إنه مش ناوي يقيل جيروم باول .. رئيس الاحتياطي الفيدرالي .. بعد ما كان من كام يوم بس بيهدد إنه هيطرده بسبب إنه مش عايز يخفّض أسعار الفايدة زي ما ترامب عايز .. التصريح ده هدّى الأسواق .. عشان لما الناس كانت خايفة إن ترامب هيتدخل في استقلالية البنك المركزي الأمريكي .. ده كان بيخلّيهم يشتروا دهب أكتر .. لكن لما تراجع عن تهديده .. الخوف قلّ .. والطلب على الذهب كملاذ آمن نقص .. فالأسعار نزلت.
مش بس كده .. ترامب زاد الارتياح لما أبدى تفاؤل عن قرب التوصل لاتفاق تجاري مع الصين .. وقال إن الاتفاق ده ممكن يخفّف الرسوم الجمركية على البضايع الصينية بشكل كبير .. طبعًا الأسواق العالمية فرحت بالخبر ده .. لأن الحرب التجارية بين أمريكا والصين كانت سبب رئيسي في التوترات الاقتصادية الفترة اللي فاتت .. الرسوم الجمركية اللي وصلت لـ145% على الصين خلّت الأسواق في حالة قلق .. وده كان بيدعم الدهب .. لكن لما بقى فيه أمل إن التوترات دي تهدى .. المستثمرين بدأوا يبيعوا الدهب ويروحوا للأسهم والدولار .. والنتيجة سعر الأونصة عالميًا نزل بنسبة 2% لحوالي 3315 دولار .. وده انعكس على السوق المصري على طول.
طيب .. إزاي ده بيأثر علينا هنا في مصر؟
السوق المصري مرتبط جدًا بالأسعار العالمية .. لأن الدهب عندنا بيتم تسعيره بناءً على سعر الأونصة في البورصة العالمية .. وبيضاف عليه سعر الدولار في السوق المحلي .. النهاردة .. الدولار كمان شهد تراجع طفيف بعد تصريحات ترامب .. لأن الدولار زي الدهب .. بيخسر شوية من قوته لما الأوضاع الاقتصادية بتهدى .. وده كمان ساعد على خفض أسعار الذهب عندنا
بس مش كل حاجة بسبب ترامب .. فيه عوامل محلية برضو .. الإقبال على شراء الدهب في مصر الفترة الأخيرة كان ضعيف شوية .. وده بسبب استقرار سعر الصرف نسبيًا .. يعني الناس مش حاسة إن الجنيه هيخسر قيمته بسرعة .. فالجري على الدهب قلّ .. وكمان توافر المعروض من الدهب في السوق المحلي ساعد على تثبيت الأسعار ومنعها من الارتفاع الجنوني.
طب هل التراجع ده هيستمر؟ .. ولا دي فرصة للشراء؟
محدش يقدر يقول بشكل قاطع .. لأن السوق دلوقتي متقلب جدًا .. لو الاتفاق التجاري مع الصين فعلاً تم .. ولو الأوضاع الاقتصادية العالمية استمرت في التحسن .. يبقى ممكن الدهب ينزل أكتر .. بس لو ترامب رجع قلب الطاولة زي عادته .. أو لو ظهرت أي أزمات جديدة .. الدهب ممكن يرجع يطير تاني .. عشان كده .. لو بتفكر تشتري .. خلّي عينيك مفتحة وتابع الأخبار كويس.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
