ليه الحكومة اشترطت شهادة دخل علشان تاخد شقة بديلة؟، وهل كبار السن وأصحاب المعاشات هيلاقوا صعوبة في استخراج الورق ده؟، طيب واللي شغله حر أو بيعتمد على دخل يومي.. هيعرف يقدم إزاي؟.. وهل الشرط ده معمول للشفافية والعدالة؟ ولا ممكن يوقف ناس كتير عن التقديم؟، وإيه مصير المستأجرين اللي معندهمش دخل ثابت يثبتوه بالأوراق؟..
الحكومة أعلنت مؤخرا عن خطوة جديدة خلت ناس كتير تتفاجئ، وهي أن أي حد عايز يقدم على الشقق البديلة للإيجار القديم لازم يقدم شهادة دخل أو مفردات مرتب ضمن الأوراق المطلوبة.
الشرط ده مهم جدًا وخصوصًا لكبار السن اللي عايزين يضمنوا إنهم ياخدوا وحدة سكنية مناسبة بدل الشقة القديمة اللي كانوا عايشين فيها بالإيجار.
الموضوع كله هيبدأ من أول أكتوبر الجاي، وهيفضل مفتوح لمدة 3 شهور، والتقديم هيكون يا إما عن طريق المنصة الإلكترونية الموحدة، يا إما من خلال مكاتب البريد المنتشرة في كل المحافظات، يعني الإجراءات بقت سهلة ومش هتحتاج جري كتير زي زمان.
خلينا نقول التفاصيل ببساطة، لو حضرتك مستأجر أصلي أو زوج/زوجة ليه، أو حتى امتد ليك عقد الإيجار قبل صدور القانون الجديد، يبقى ليك الحق تقدم على وحدة بديلة، ومش بس الوحدات السكنية، ده كمان فيه وحدات غير سكنية زي المحلات والمكاتب، بس المهم تقدم المستندات المطلوبة وتحدد عنوان العقار، والنطاق اللي عايز الوحدة فيه، وكمان تختار هل عايزها إيجار ولا تمليك.
طيب إيه الأوراق اللي الحكومة مركزة عليها؟ أهم ورقة في الملف كله دلوقتي هي اللي بتثبت دخلك، يعني لو شغال في حكومة أو قطاع أعمال: هتجيب شهادة معتمدة من جهة العمل فيها كل تفاصيل مرتبك أو دخلك السنوي، ولو شغال في شركة قطاع خاص: برضه شهادة معتمدة، موضح فيها السجل التجاري والبطاقة الضريبية للشركة، ولو عندك شغل حر أو نشاط تجاري، لازم تقدم ما يثبت إنك مسجل في الضرائب، وشهادة من محاسب قانوني معتمد توضح دخلك السنوي أو الشهري، ومعاها نسخة من السجل التجاري أو البطاقة الضريبية.
كمان لو حضرتك أرملة أو مطلقة أو من أصحاب المعاشات، هتجيبي ورقة من التأمينات ببيانات المعاش، أو صورة من مستند النفقة بالنسبة للمطلقة.
الشرط ده اتعمل عشان يبقى فيه شفافية في توزيع الوحدات، وكل واحد ياخد على قد احتياجاته ودخله، يمكن ناس تشوفه معقد شوية، بس في الحقيقة هو ضمان إن الشقق تروح لمستحقيها بجد، وخصوصًا كبار السن اللي محتاجين سكن آمن ومناسب.
السؤال اللي بيطرح نفسه دلوقتي، هل كبار السن هيقدروا بسهولة يوفروا الورق ده ولا الموضوع هيعمل لهم عائق؟ وهل الشرط ده هيخلي بعض الناس تعزف عن التقديم ولا الكل هيتأقلم عليه؟
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
