منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن تحول مصر لمركز صناعي إقليمي في ألواح الصاج.
قال التقرير، إن مصر دلوقتي ماشية بخطة كبيرة عشان تبقى مركز صناعي مهم في المنطقة، ومن أكتر الصناعات اللي واخدة دعم وتركيز هي صناعة الصاج، وده لأنه مهم جدًا في حاجات كتير حوالينا زي التلاجات والغسالات والتكييفات، وهياكل العربيات والمقطورات، وكمان الأثاث المعدني والمعدات الزراعية وعلب الأكل والمشروبات، وحتى في أسقف المصانع والهياكل المعدنية، يعني مفيش صناعة تقريبا مش محتاجة صاج.
وأضاف تقرير بانكير، أن وزارة الصناعة قررت تركز عليه، وهدفها تزود الإنتاج المحلي وتصدر الفائض، وده هيقلل الاستيراد ويوفر عملة صعبة، وكمان يزود التصدير ويدخل عملة للبلد.
وأوضح التقرير، أن الحكومة كمان طلعت حوافز قوية للمستثمرين اللي عايزين يشتغلوا في المجال ده، زي أسعار أراضي كويسة، تسهيلات في الدفع، قروض ميسرة، ورخص بتطلع في 24 ساعة، وكمان المرافق متوفرة على طول، وهي ميه، كهربا، غاز، طرق، وكل حاجة جاهزة.
وفيه كمان أولوية لمصانع الصاج في تلبية مشروعات الدولة، يعني المستثمر يضمن إنه هيبيع إنتاجه من أول يوم.. الفكرة مش بس في فتح مصانع، دي خطة متكاملة علشان نبني صناعة قوية تخلي مصر لاعب كبير في السوق الإقليمي، وده بيتم بتنسيق كبير بين الوزارات.
منصات بانكير قدمت تقرير مختلف النهاردة عن خطة مصر لتحقيق الاكتفاء الذاتي من الغاز الطبيعي.
أكد التثقرير، أن مصر ماشية بخطى كبيرة علشان تحقق حلم الاكتفاء الذاتي من الغاز الطبيعي، وده حصل بعد ما الإنتاج المحلي قل جدًا، في الوقت اللي الاستهلاك زاد بشكل كبير سواء في المصانع، أو الكهرباء، أو حتى الاستهلاك المنزلي وتموين السيارات.. بسبب ده، بدأت أزمات كبيرة تظهر، زي أزمة الكهرباء اللي خلت الناس تعاني من انقطاع التيار لساعات يوميًا في كل المحافظات، وكان فيه تخوف من تأثير الأزمة على الصناعة واستمرار الاستثمارات الأجنبية.
وأوضح التقرير، أن الحكومة اتحركت أول ما بدأت الفترة الرئاسية الجديدة للرئيس السيسي، وبدأت بخطوتين مهمين، أول خطوة كانت فتح باب استيراد الغاز علشان تغطي العجز، والتانية كانت حل مشكلة انخفاض إنتاج الغاز، واللي طلع سببه الرئيسي تأخر الحكومة في دفع مستحقات الشركات الأجنبية اللي شغالة في التنقيب.. فبدأت الحكومة تدفع المستحقات فعليًا، وحددت مواعيد واضحة لسداد الباقي، وده طمن الشركات فرجعوا يشتغلوا تاني، وكمان دخلت شركات جديدة السوق بعد ما شافت الجدية دي.
وأشار التقرير إلى أن أهم الشركات دي شركة "إيني" الإيطالية اللي رجعت تشتغل في حقل "ظُهر" وبتطوره وتحفر آبار جديدة.. ومتوقع أن مع بداية 2027، مصر تحقق الاكتفاء الذاتي من الغاز الطبيعي، وتبدأ كمان تصدره تاني، والحكومة بتتحرك بخطة واضحة علشان تحل الأزمة وتخلي مصر ترجع مركز مهم في سوق الطاقة.
وحدة أبحاث بانكير قدمت تقرير خاص النهاردة عن حكاية مشروع الاستثمار السعودي في جزيرة الجيزة.
قال التقرير، إن بعد صفقة رأس الحكمة اللي مصر عملتها مع الإمارات، واللي جابت 35 مليار دولار ودعمت الاقتصاد بشكل كبير، بقى فيه اهتمام عالمي بالسوق المصري، خصوصًا في السياحة، ناس كتير بدأت تدور على فرص استثمار، والسعودية كانت من أوائل المهتمين.
واستعرض تقرير بانكير، التقارير الأخيرة اللي بتقول إن السعودية عرضت على مصر مشروع استثماري ضخم في جزيرة القيراطين، واللي موجودة في نهر النيل تبع مركز أوسيم بالجيزة، الجزيرة دي معروفة بزراعة الموز والخضار، بس البنية التحتية فيها ضعيفة، ووسيلة الوصول الوحيدة ليها هي المعديات، مفيش لا كورنيش ولا طريق مباشر.
وأوضح التقرير، أن العرض السعودي بيتكلم عن تحويل جزء من الجزيرة لمشروع سياحي عالمي ترفيهي وعلاجي، باستثمارات توصل لـ 2.5 مليار دولار، والتنفيذ هيكون على حوالي 90 شهر، والمشروع متوقع يجيب إيرادات 1.4 مليار دولار في أول 5 سنين، والعائد السنوي على رأس المال هيكون حوالي 7%، ولو المشروع اتنفذ، هيبقى فيه فرص شغل كتير للشباب في السياحة والبناء والخدمات، وهيحسن البنية التحتية حوالين النيل، وممكن يجذب سياحة محلية وأجنبية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
