يا ترى الحكومة ناوية تستغل فوز مصر بجائزة الآغا خان إزاي؟.. هل مدينة إسنا هتبقى مجرد خبر عالمي عدى؟ ولا هتبقى مقصد سياحي يفضل على الخريطة؟.. وإزاي الوزارات هتربط إسنا بباقي المزارات الكبيرة في الأقصر وأسوان؟، وهل فيه خطة لحملات دعائية دولية تليق بالحدث ده؟..
مصر رجعت تتصدر المشهد العالمي من تاني بعد ما مشروع إحياء مدينة إسنا التاريخية في الأقصر خطف جايزة الآغا خان العالمية للعمارة 2025، الجايزة دي مش أي كلام، دي شهادة قدام العالم كله إن مصر مش بس بتحافظ على تراثها، لكن كمان بتعرف إزاي تحوله لمصدر للتنمية المستدامة والسياحة.
بس إحنا إزاي هنستثمر الفوز ده؟ وإزاي الحكومة تقدر تحوله لفرصة ذهبية تخلي الصعيد على خريطة السياحة العالمية؟
أول حاجة، لازم نستغل الدعاية العالمية اللي حصلت، ونعمل حملات تسويقية كبيرة لمدينة إسنا باعتبارها وجهة سياحية جديدة، مش بس للأجانب، لكن كمان للمصريين اللي محتاجين يكتشفوا جمال بلدهم، المدينة دي مش مجرد مباني متجددة، دي روح وهوية مصرية معمولة بحرفية، فيها مزيج بين العمارة التراثية والتنمية الحديثة.
تاني حاجة، الحكومة لازم تربط إسنا بخريطة السياحة في الأقصر وأسوان، يعني السياح اللي جايين يشوفوا معبد الكرنك ووادي الملوك، ليه ميعدوش يوم في إسنا؟ لازم يكون فيه برامج سياحية متكاملة وأوتوبيسات ومراكب نيلية وجولات للمرشدين السياحيين، بحيث تبقى الرحلة كلها تجربة مختلفة ومترابطة.
تالت حاجة، لازم يكون إشراك المجتمع المحلي، ودي النقطة الأهم، لأن المشروع من الأول قام على تمكين الناس، يعني أهل إسنا نفسهم يفتحوا بيوت ضيافة ومطاعم صغيرة ومحلات حرف يدوية، كده الفلوس مش بس تدخل البلد، دي كمان تدخل جيوب الناس وتخليهم هم اللي يحافظوا على التراث بوعي وحب.
كمان لازم الحكومة تفكر في تعميم التجربة، لأن مش عاوزين إسنا تكون المدينة الوحيدة، لأن عندنا مدن تاريخية كتير في قنا وأسوان وسوهاج، محتاجة نفس الفكرة: ترميم وإحياء ودمج للتراث في الحاضر، ولو التجربة دي اتكررت، مصر كلها هترجع تبقى منارة للثقافة والمعمار.
مش بس وكده، لازم وزارة السياحة تطلق حملات عالمية تبرز أن مصر مش بس أهرامات وأثار فرعونية، لكن كمان عندها مدن حية بتتنفس تراث، زي إسنا، وده يخلي السياحة الثقافية تنفجر تاني، وده النوع اللي بيصرف فلوس وبيفضل أيام طويلة.
وفي الآخر، لازم نفهم إن الفوز بجايزة الآغا خان مش مجرد تكريم معماري، لكن فرصة سياسية واقتصادية وسياحية كبيرة، لأن مصر تحت قيادة الرئيس عبد الفتاح السيسي عندها كل المقومات إنها تبقى واحدة من أهم الدول السياحية في العالم، واللي حصل في إسنا مش نهاية القصة، دي مجرد بداية لحقبة جديدة من الريادة المصرية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
