يا ترى إيه اللي بيحصل للفضة، وهل هتكون هي الاستثمار الذكي في الأيام الجاية وممكن تحل محل الدهب، وإيه اللي ممكن يحصل الأيام الجاية؟.
في الحقيقة، الدهب كان دايما هو البطل في ساحة المعادن، بس فجأة الفضة بدأت تخطف الأضواء، وبقت على رادار أكبر المستثمرين والبنوك العالمية.
بص يا سيدي، الفضة في الشهور اللي فاتت عملت شغل عالي اوي، واتعدت حاجز ال 30 دولار للأوقية لأول مرة من أكتر من 10 سنين، وده خلا مؤسسات مالية ضخمة زي "بنك أوف أميركا" و"جيه بي مورجان" و"ساكسو بنك" تقولك خلي بالك، إحنا ممكن نشوف الفضة عند 40 دولار قبل ما سنة 2025 تخلص.
كمان، الطلب الصناعي بيغلي والموضوع مش بس استثمار، ده في طلب صناعي مرعب على الفضة، خاصة من قطاع الطاقة الشمسية، وكل لوح شمسي فيه تقريبا 20 جرام فضة، تخيل ممكن الطاقة الشمسية لوحدها تاكل 30% من الإنتاج العالمي بحلول 2030.
كمان، العربيات الكهربائية بقت بتعتمد على الفضة في أنظمة التحكم، يعني كل ما العالم يتحول للطاقة النظيفة الفضة تكسب أكتر.
عندك كمان، الفايدة بتلعب دور وإنت بتستثمر في أي معدن، لازم تبص على أسعار الفايدة، واللي بيحصل دلوقتي إن التوقعات كلها بتقول إن أمريكا ممكن تبدأ تخفض الفايدة قريب، وده معناه إن المعادن خاصة اللي مش بتدي عائد زي الفضة، بتبقى جذابة أكتر، لأن تكلفة الاحتفاظ بيها بتقل.
بردو، في لاعب جديد دخل الملعب، وهو البنك المركزي الروسي، اللي قرر يشتري فضة ب 535 مليون دولار خلال 3 سنين، وده شيء نادر جدا، فالبنوك المركزية عادة بتشتري دهب مش فضة، بس الخطوة دي بتأكد إن الفضة مش مجرد معدن صناعي، لأ دي بقت ملاذ آمن واستثمار طويل المدى.
طب هل في مخاطر؟
اه طبعا، السوق فيه عجز في المعروض من الفضة من 2021، وده مستمر، وده ضغط على الأسعار، لكن المشكلة إن 70% من الفضة بتيجي كمنتج ثانوي لمناجم النحاس والزنك، ومع تراجع الإنتاج من المناجم دي فالمعروض بقى أضعف، يعني ببساطة العرض بيقل، والطلب بيزيد وكمان الأسعار ممكن ترتفع تاني.
بردو، الفضة مش تابعة للدهب بس اللي كان بيحصل زمان إن الفضة دايما تتحرك ورا الدهب، لو الدهب طلع الفضة تطلع معاه، بس دلوقتي لأ، لان الفضة بقت ليها شخصيتها المستقلة، سوق لوحده ومحركات مختلفة، وده معناه إن اللي يستثمر فيها بدري ممكن يسبق السوق كله.
ونقدر نقول إن مهم جدا تنوع المحفظة الاستثمارية بتاعتك، عشان تكون في الأمان أكتر.
طب دلوقتي، تستثمر في الدهب ولا الفضة؟
الإجابة هي الاتنين، بس الأذكى إنك تعمل توازن، لأن الفضة فيها مخاطرة أعلى، بس فرص الربح فيها برضو أعلى، يعني لو بتدور على استثمار متوازن ومتنوع فدخول جزء من محفظتك في الفضة ممكن يكون حركة ذكية جدا في النص التاني من 2025.
وحاليا، كل المعطيات بتقول إنها مرشحة بقوة، بس القرار في إيدك، تابع السوق، ركز في تحركات الفايدة وشوف الطلب الصناعي رايح فين، وخد قرارك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
