العاملين المصريين بالخارج تحول لكنز محدش كان عارف قيمته، وكان هما السند لمصر في وقت ازمتها.. ياتري اية اللي عملوا المصريين العاملين بالخارج.. واية الرد اللي قدمته الحكومة للجميل اللي عملوه مع الدولة المصرية.
الفترة اللي فاتت وتحديدا في 2023 مصر كان عندها أزمة كبيرة جدا في توفير العملات الأجنبية في البنوك، والازمة دي لها اكثر من سبب اهمهم كان وجود السوق السودا في التجارة بالعملات واللي كانت للاسف بتستنزف كل العملات الأجنبية في السوق وتصدرها لجهات غير معلومة، وللاسف كمان كانت هيا اللي بتلم كل العملات الأجنبية اللي موجودة من المصريين العاملين بالخارج خصوصا أنها كانت بتقدم اسعار اعلي بكتير من اللي موجودة في البنوك.
طيب ازاي الدولة رجعت كل تعاملات المصريين العاملين بالخارج للقنوات الرسمية؟.
مع بداية 2024 الدولة اخذت قرار تاريخي وهو تحرير سعر الصرف في مصر بشكل مرن، وده خلي الأسعار في البنوك تترتفع وتنخفض بشكل حر، وبالتالي كل تعاملات المصريين رجعت لقنواتها الرسمية، خصوصا أن البنوك بقت بتقدم اسعار مش موجودة في السوق السودا واللي مبقاش في داعي اصلا لوجودها ده غير كمان أنها بتوفر عاملي الأمن والأمان خصوصا أن في عدد كبير من المصريين تعرضوا لمحاولات نصب وفي ناس منهم فلوسها راحت في عمليات نصب بسبب تعاملاتهم مع ناس غير موثق فيهم.
بعد ما كل تعاملات المصريين رجعت لقنواتها الرسمية، بدأت تحويلات المصريين بالخارج ترجع لقنواتها الرسمية في البنوك، وفي الأيام اللي فاتت تحويلات المصـريين العاملين بالخارج حققت خلال 10 شهور من الفترة يوليو 2024 وحتي إبريل 2025 قفزة تاريخية غير مسبوقة وارتفعت بمعدل 77.1% علشان تسجل 29.4 مليار دولار.
بعد الارقام الكبيرة اللي حققتها تحويلات المصريين بالخارج فالدولة بالبلدي كده حبت ترد الجميل وكمان تزود ايراداتها من تحويلاتهم ووزارة الإسكان والمجتمعات والمرافق العمرانية، طرحت المرحلة الثانية من مبادرة بيتك في مصر، واللي بتضم ما يقرب من 3 آلاف وحدة سكنية وإدارية وتجارية ضمن 19 مشروع في 12 مدينة، واللي بتناسب مختلف فئات وشرائح وطلبات المصريين بالخارج، وهيكون سداد قيمة الوحدات بالدولار الأمريكي.
الطرح الجديد لشقق المصريين العاملين بالخارج هيكون علي 3 مراحل وهتكون عمليات الطرح في شهور سبتمبر وأكتوبر ونوفمبر القادمين، وده بهدف توفير فرص استثمارية قدام المصريين المقيمين بالخارج وتعزيز استفادتهم من التنمية العمرانية اللي بشهدها مصر .
الطرح اللي هيتم الإعلان عنه خلال الأيام اللي جاية هيتضمن عدد 5055 وحدة سكنية، منها وحدات متاحة للتسليم الفوري ووحدات تانية سيتم تسليمها تباعا واللي هتراعي مختلف شرائح الدخل والمستويات الاقتصادية، وهتكون فيها عروض حصرية ومميزة للمصريين المقيمين بالخارج، منها طرح خصومات هتتراوح بين 3 إلى 10% عن سعر الوحدات المعلن بالسوق بالإضافة إلى أنظمة سداد متنوعة تصل إلى 10 سنين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
