منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. والبداية بتقرير عن عودة أمجاد شركة النصر للسيارات في السوق المصري.
أكد التقرير، أن شركة النصر للسيارات قررت بالتعاون مع وزارة قطاع الأعمال ومحافظة الإسكندرية، توريد 120 أتوبيس صديق للبيئة شغالين بالغاز الطبيعي، وهيشتغلوا ضمن منظومة النقل الجماعي في إسكندرية، وده بيجي تنفيذا لتوجيهات رئيس الوزراء الدكتور مصطفى مدبولي، اللي بيدفع دايما لتطوير وسائل النقل والتحول للطاقة النظيفة.
وأوضح التقرير، أن ده مش مجرد صفقة نقل، دي خطوة قوية في اتجاه دعم الصناعة الوطنية، وتحديدا صناعة السيارت الصديقة للبيئة، وده معناه إننا مش بس بنقلل التلوث لأ كمان بنشجع المنتج المحلي ونفتح فرص شغل.. ومن هنا، قال وزير قطاع الأعمال، إن شركة اللنصر للسيارات راجعة بموديلات جديدة مواكبة للمعايير العالمية، وفي نسبة مكون محلي محترمة في الأتوبيسات الجديدة، يعني الفلوس بتدور جوه السوق المصري وسلاسل التوريد شغالة والقيمة المضافة بتزيد.
وأشار التقرير إلى أن الخطوة دي هتحسن خدمة النقل الجماعي للمواطنين بالإسكندرية، وهتقلل الزحمة والتلوث وهتدي شكل حضاري أكتر للمدينة، يعني كسبنا خدمة أحسن وهواء أنضف ومنظر أفضل وكله في صف المواطن.. ودي مش آخر خطوة، لأن اللي حصل ده جزء من خطة أكبر بتقودها وزارة قطاع الأعمال لتحديث شركاتها وتحويلها لقوة إنتاجية عصرية، بتستخدم الطاقة النظيفة وبتدخل في صناعات المستقبل وكمان بتدعم الاقتصاد المصري بشكل حقيقي ومستدام.
وأضاف تقرير بانكير، أن النصر للسيارات راجعة وبقوة، وبتقول للسوق "أنا موجودة، ورايحة على تصنيع حديث ونقل نظيف ومستقبل أحسن"، وده طبعا بيشجع الشركات التانية انها تكمل على نفس السكة لأن لما الصناعة الوطنية ترجع تبان، مصر كلها هتكون في مكان تاني.
منصات بانكير قدمت تقرير مختلف النهاردة عن اقتحام الشركات العالمية عالم الثروات التعدينية في مصر
كشف تقرير بانكير، أن فيه شركات عالمية دخلت اللعبة، وبدأت تشتغل مع الدولة علشان نرسم خريطة جديدة للثروات اللي تحت رجلينا، وفي اجتماع مهم جدا حصل في مقر وزارة البترول بمدينة العلمين الجديدة، ووزير البترول والثروة المعدنية المهندس كريم بدوي قعد مع ممثلين من شركات ضخمة زي مثلا أرجاس وميتاتك وإيكسكاليبور ونوفيا، والشركات دي متخصصة في المسح الجوي والتصوير السيزمي، يعني ببساطة بتعرف فين الكنز قبل ما نحفر.
وأضاف التقرير، أن الدولة بتشتغل بخطة واضحة علشان تزود مساهمة قطاع التعدين في الناتج المحلي من أقل من 1% ل5 أو 6%، يعني ده قطاع ضخم ومليان فرص، ومصر عندها بنية تحتية قوية جدا تقدر تخدم القطاع ده،. زي مثلا مواني وطرق ومحطات تصدير، وكمان طاقة متوفرة من الإنتاج المحلي.
وأكد تقرير بانكير، أن الشركات دي هتستخدم تقنيات حديثة للمسح الجوي، يعني هتحلل البيانات الجيولوجية وهتحدد مناطق واعدة بالثروات المعدنية، يعني بدل ما نحفر على عمانا، هنشتغل بعلم وبيانات دقيقة.. كمان، الوزير طلب منهم خطة شاملة عشان نبدأ الشغل بسرعة ونحقق نتايج ملموسة.. يعني باختصار مصر مش بس بتستخرج دهب وفوسفات ونحاس، لا ده مصر بتخطط تبقى مركز إقليمي للتعدين الحديث، والشركات العالمية لما تيجي تشتغل هنا، فده معناه إن السوق واعد والمستقبل مش بعيد، ده بدأ.
وحدة أبحاث بانكير قدمت تقرير خاص النهاردة عن تفاصيل مشروع القطار الكهربائي السريع.
أكد التقرير، أن الحكومة المصرية شغّالة حاليًا على تنفيذ الخط الأول من مشروع القطار الكهربائي السريع، اللي هيربط مرسى مطروح بالإسكندرية.. وده يعتبر خطوة قوية جدًا في تطوير منظومة النقل الحديثة في مصر.. الخط هيبدأ من مطروح، ويمر بـ الضبعة والعلمين الجديدة وبرج العرب ويوصل في الآخر لـ الإسكندرية، وده معناه إن الناس اللي رايحين الساحل أو راجعين منه، هيقدروا يسافروا بأمان، بسرعة، وراحة من غير زحمة ولا تعب الطريق.
وأوضح تقرير بانكير، أن القطار سرعته توصل لـ 250 كم في الساعة!، يعني الرحلة من مطروح للإسكندرية اللي كانت ممكن تاخد 4 ساعات أو أكتر، هتبقى تقريبًا ساعة ونص أو أقل، والهدف منه هو ربط المحافظات الساحلية ببعضها بشكل أسرع وأكتر كفاءة وتقليل الاعتماد على العربيات والباصات على الطرق السريعة، وده هيقلل الحوادث، كمان هيكون خدمة للسياحة في مناطق زي مطروح والعلمين والساحل، وكمان تقليل استهلاك البنزين والوقود، لأنه قطار كهربائي صديق للبيئة
وأشار تقرير بانكير، إلى أن المشروع مش بس قطار، لأ.. ده منظومة لوجستية ضخمة بتربط السخنة، مرورًا بالعلمين ومطروح، لحد الإسكندرية.. وده جزء من توجيهات الرئيس عبد الفتاح السيسي علشان ننجز 7 ممرات لوجستية متكاملة تربط أماكن الإنتاج بالمواني، وتربط البحر الأحمر بالبحر المتوسط.. يعني الموضوع مش مجرد مشروع وخلاص، ده فيه تحالف كبير شغال عليه ومن "سيمنز وأرواسكوم والمقاولون العرب، ولحد دلوقتي تم تسليمهم 387 كم من أصل 660 كم علشان يركبوا القضبان وأعمدة الكهرباء، وباقي القطاعات بيتم تسليمها تباعا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
