يا تري إيه علاقة قرارات الفيدرالي الأمريكي اللي في آخر الدنيا بالجنيه اللي في جيبك؟ وهل ممكن قرار واحد من البنك ده يغير شكل الاقتصاد المصري كله في شهور قليلة؟
تخيل كده إن الدولار اللي كلنا بنشتكي من سعره، قوته هتبدأ تقل في العالم كله.. وإيه اللي ممكن يحصل للجنيه المصري في ظل التغير ده؟
الحكاية باختصار شديد... من شهور طويلة، والفيدرالي الأمريكي بيرفع سعر الفايدة عنده عشان يحارب التضخم. ده كان عامل زي ما يكون بيسحب الفلوس من العالم كله ويلمها عنده في أمريكا. ليه؟ لأن المستثمرين بيلاقوا إن العائد على الاستثمار في أمريكا بقى مغري جداً، فيروحوا يسحبوا فلوسهم من الأسواق الناشئة زي مصر، ويودوها هناك.
لكن دلوقتي، الوضع بيتغير. سوق العمل الأمريكي بدأ يتباطأ، ومؤشرات النمو بتدي إشارات على إن ممكن الاقتصاد الأمريكي يبرد شوية. كل ده بيخلي التوقعات تزيد إن الفيدرالي هيعمل حاجة واحدة: يوقف رفع الفايدة، أو يمكن كمان يبدأ يخفضها.
طب وإحنا مالنا؟
إحنا مالنا ونص كمان. لو الفيدرالي خفض الفايدة، تأثير ده علينا هيكون على كذا مستوى..أولاً: على الجنيه المصري..قوة الدولار هتبدأ تقل في العالم كله. ده معناه إن الضغط على الجنيه المصري هيخف بشكل كبير.. مش بس كده،. ده كمان هيخلي البنك المركزي المصري عنده قدرة أكبر على إنه يتحكم في سعر الصرف، ويخليه مستقر أكتر. وده مش معناه إن الجنيه هيطير فجأة، بس معناه إنه هيسترد عافيته شوية بشوية، ومخاطر إنه يقع تاني هتقل.
كمان ليه تأثير على الاستثمارات الأجنبية.. المستثمر اللي كان بيجري على أمريكا عشان الفايدة العالية هناك هيبدأ يدور على أماكن تانية تدي له عائد أفضل.. ومصر بفايدتها اللي لسه عالية، هتبقى مغرية جداً للاستثمارات دي.. الفلوس دي اللي بنسميها "محافظ استثمارية" هترجع تاني تتدفق على أدوات الدين الحكومي المصرية، زي أذون الخزانة والسندات. وده هيعزز احتياطي النقد الأجنبي، ويدي قوة أكبر للاقتصاد المصري.
فيه تأثير مهم كمان على البورصة والشركات المصرية.. لما الدنيا تبقى أهدى، والجنيه مستقر، والسيولة العالمية تزيد، شهية المستثمرين للمخاطرة بتزيد.. يعني المستثمر ممكن يفكر يحط فلوسه في أسهم شركات عندها إمكانات نمو حقيقية، وده هيرجع الحياة لسوق الأسهم المصري، ويخليه جذاب للمستثمرين الدوليين.
باختصار... قرار واحد من الفيدرالي الأمريكي ممكن يفتح الباب لمصر عشان تكسب مكاسب اقتصادية مهمة. بس ده مش معناه إننا نعتمد على الظروف الخارجية بس. دي فرصة ذهبية، عشان نكمل مسيرة الإصلاح الاقتصادي، ونبني اقتصاد قوي ومتنوع مش بيعتمد على مصدر واحد للدخل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
