«لازم يعرفوا قيمة التيشيرت».. عبدالحفيظ للاعبي الأهلي: «لو أنا موجود لا تجديد ولا زيادات»

أبدى سيد عبدالحفيظ، مدير الكرة السابق بالنادي الأهلي، استياءه من أداء لاعبي الفريق عقب التعادل مع إنبي، مؤكدًا أن المشكلة الحقيقية تتجاوز التحليل الفني والخطط داخل الملعب، وتبدأ من فهم اللاعبين لقيمة النادي وشعاره.

عبدالحفيظ: اللاعيبه دي لازم تعرف يعني إيه أهلي

وقال عبدالحفيظ في تصريحات تلفزيونية: «اللاعيبه دي لازم تعرف يعني إيه الأهلي، ويعني إيه تيشيرت الأهلي، ويعني إيه جمهور الأهلي، قبل ما نحلل أداء اللاعبين ونتكلم في طرق اللعب، لازم الأول نفهمهم يعني إيه الأهلي.. يعني إيه نادي عنده روح ونخوة».

وأضاف: «الأهلي عنده مشكلة، والمختصين هما اللي يقدروا يحددوها مش عيب تقول إن عندك مشكلة، العيب إنك تكبّر المشكلة أو تسيبها تكبر من غير ما تدخل».

وتابع: «لو أنا موجود مكنتش هجدد للاعيب ولا أمدد عقود لحد النتائج ما تتحسن واللاعيبه ترجع تلعب بروح تاني».