كماليات العربيات واحدة من الصناعات اللي وأخذه جزء كبير جدا من اهتمامات الحكومة.. ياتري ازاي الدولة بتفكر في صناعات كماليات العربيات.. وآية الفائدة اللي بترجع علي الاقتصاد المصري من الصناعة دي .. ومستهدفات الحكومة منها كام.
الفترة دي الصناعة وأخذة مساحة كبيرة من اهتمامات الحكومة خصوصا الصناعات اللي عليها طلب كبير في السوق المحلي، واحدة من الصناعات دي هيا صناعة العربيات وكمالياتها، خصوصا أن فاتورة مصر الاستيرادية خلال السنين اللي فاتت كانت عبارة عن واردات سهل جدا إنتاجها وتصنيعها في السوق المصري.
في الوقت اللي الدولة ركزت فيه علي صناعة العربيات بكل أنواعها ودخلت عدد كبير من كبري الشركات للسوق المصري علشان تصنع الأنواع اللي مطلوبة من المواطنين وكمان يكون عندنا انتاج قوي قادر علي المنافسة في الأسواق الخارجية ويكون بجودة عالية، برضوا كان في اتجاه تاني من الحكومة بتصنيع كماليات العربيات زي الكواتشات والضفائر الكهربائية وغير من الحاجات اللي بتكون مطلوبة لسوق وصناعة السيارات في مصر.
طيب ليه الحكومة استهدفت توطين صناعة كماليات العربيات وأيه فوائدها علي الاقتصاد المصري ؟.
زي ما الدولة اهتمت بصناعة العربيات برضوا كان في اهتمام بتوطين صناعة كماليتها، وبرضوا بقي عندنا خطط لتوطين صناعة كماليات العربيات في مصر، والخطة مش واقفة علي تجميع العربيات وخلاص، لا ده كمان بقي عندنا صناعات كتيرة مرتبطة بالعربيات زي الكاوتش والضفائر الكهربائية وده بهدف وقف الاستيراد الخارجي من الأنواع دي واللي عليها طلب سواء في عمليات الصيانة أو التصنيع.
وزي ما الحكومة دخلت وعملت شراكة مع القطاع الخاص في كل حاجة، كمان فتحت الباب قدام القطاع الخاص للدخول في واحدة من أهم الصناعات اللي مطلوبة في الشارع المصري وهيا صناعة كماليات السيارات، والدولة وافقت على مشروع شركة سوميتومو، واللي شغالة في مجالات تصنيع الضفائر الكهربائية علشان تدخل وتعمل مصنع لهم في مدينة العاشر من رمضان، والمصنع حجمه ضخم وهيصنع ضفائر وكمان عقول إلكترونية لحد مليون عربية سنويا، وهيوفر عدد كبير من فرص العمل للشباب سواء كانت بشكل مباشر أو غير مباشر، ده غير أن هيكون باب كبير لزيادة الصادرات المصرية من كماليات العربيات واللي عليها طلب عالمي من كل الدول.
نقطة مهمة كمان في توطين صناعة العربية وهيا الاطارات أو الكاوتش بتاع العربيات واللي الدولة برضوا حطت له خطه لتوطينه في مصر، وفي مشروع كبير الدولة عملته من القطاع الخاص مدينة السخنة، لتصنيع وانتاج إطارات العربيات، والمصنع ده هيصنع حوالي 7 مليون إطار سنويا باستثمارات في حدود مليار يورو، وده طبعا هيوفر علي مصر مليارات الدولارات كانت بتصرفها علشان توفر حاجة عليها طلب كبير في السوق المصري، وكمان فتحنا باب جديد للصادرات من اطارات العربيات وبقي لنا اسم الناس كلها بتعرفه زي مصنع بيراميدز واللي بقي ماركة مصرية عالمية مسجله باسم مصر.
كل الخطوات دي كانت جزء كبير من مكة الدولة لتوطين صناعة العربيات، وإعادة احياء المصانع اللي كانت في حكم الاموات دي مصنع النصر للسيارات واللي الدولة اعادت احياءه من جديد في 2024، وبيشتغل حاليًا على تجميع الأتوبيسات الكهربائية بطاقة إنتاجية 300 أتوبيس سنوي، وعندنا خطة لزيادة الإنتاج لحد ما نوصل لطاقة 1500 اتوبيس مع الوقت، وبقي عندنا طلبيات للتصدير للخارج كمان.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
