مصر وقعت عقود مشروع واحد من المشروعات السياحية اللي هتغير تاريخ مصر الاقتصادي .. ياتري اية هو المشروع ده.. وازاي هيفيد المشروع الاقتصاد المصري.. وآية مستهدفات الدولة من المشروعات التنموية دي.
كل يوم الاقتصاد المصري بياخذ خطوة جديدة يعزز بيها مكانته الدولية، الخطوات دي كان سببها الخطوات اللي أخذتها الحكومة خلال السنين اللي فاتت لتسهيل دخول الاستثمارات الأجنبية للسوق المصري، واللي خلت كل المستثمرين حوالين العالم بيدورا علي فرصة للدخول للسوق المصري.
في الوقت الحالي الحكومة بتستهدف توقيع الصفقات الكبري زي اللي حصل في مشروع راس الحكمة واللي دخلت لمصر استثمارات مباشرة وصلت لـ35 مليار دولار، ده غير أنها وفرت لمصر عدد كبير من فرص العمل المباشرة والغير مباشرة، ده غير أنها هتكون سبب مباشر في دخول استثمارات أجنبية كبيرة للسوق المصري خلال الوقت اللي جاي .
طيب اية حكاية المشروع الجديد اللي الدولة وقعته وآية مستهدفات الاقتصاد المصري منه؟.
من كام ساعة رئيس مجلس الوزراء سعد توقيع عقود بين شركات إعمار مصر وسيتي ستارز مع الحكومة المصرية عقود شراكة لتدشين أحدث مشروعاتها في مراسي البحر الأحمر ودي خطوة مهمة جدا هتعزز مكانة منطقة البحر الأحمر في مصر كوجهة سياحية فريدة، وهتساهم في تعزيز إمكانات النمو الاقتصادي والسياحي في مصر باستثمارات هتوصل لـ 900 مليار جنيه .
مشروع مراسي البحر الاحمر جاي بعد نجاح تجربة مراسي الساحل الشمالي، وده المشروع اللي تحول للقلب النابض للبحر المتوسط، وعزز مكانة المنطقة وحطها على خريطة السياحة العالمية، خصوصا بعد ما نجح في جذب خلال ثلاثة أشهر أكثر من 4 مليون زائر، والمشروع الجديد هيساهم في عمل نقلة نوعية لمنطقة البحر الأحمر في مصر خلال السنين اللي جاية، وهيساهم في تعزيز مكانة مصر علي خريطة السياحة العالمية .
المشروع الجديد هيقام على مساحة 2426 فدان على ساحل البحر الأحمر، وهيكون علي بعد 30 دقيقة فقط من مطار الغردقة، وهيكون بداية للمنطقة كوجهة استثمارية جاذبة وهيحط المنطقة علي بوابة السياحة الخارجية، وهيوفر تجارب بحرية ملهاش مثيل في قلب الطبيعة الساحرة للبحر الأحمر.
مشروع مراسي البحر الأحمر هيتضمن عدد كبير من المميزات الغير مسبوقة في أي مشروع سياحي وترفيهي تاني، وهيكون وجهة بحرية هتضم شاطي خاص وبحيرات صالحة للسباحة ومطاعم راقية وكبائن خاصة، ده غير أنه هيتضمن مارينا بمعايير عالمية هتنقسم إلى مارينا رئيسية و2 بوتيك للاقامة والضيافة ومراكز التسوق.
المشروع كمان هيضم أرصفة بحرية بطول 400 متر، وقنوات مائية صالحة للملاحة تمتد في قلب المشروع، وهيوفر مراسي البحر الأحمر مرسي خاص للفيلات وشاطئ مرتفع بطول 1.5 كم وارتفاع 10 أمتار، ده غير أن هيضم 12 فندق فاخر ووحدات سكنية لخدمة جميع مناطق المشروع، وكبائن عائمة علي غرار طراز المالديف، وأكثر من 500 متجر ومطعم تطل على الواجهة المائية.
المشروع كمان هيضم مدارس تعليمية ومستشفيات ومراكز علاجية ومنطقة متعددة الاستخدامات هتشمل مركز مؤتمرات دولي ومنطقة تجارية وملاهي مائية ومرافق رياضية بمعايير عالمية ونوادي للمقيمين تركز على الترفيه.
كما سيُخصص المشروع مساحات خضراء واسعة وحدائق مفتوحة ومناطق مخصصة للتنزه، والهدف الأساسي منه هو تعزيز مكانة البحر الأحمر كمنطقة استثمارية وسياحية متكاملة، وزيادة استقطاب السياح والمستثمرين من مختلف أنحاء العالم، وهيوفر فرص عمل هتترواح من 150 الي 170 الف وظيفة مباشرة وغير مباشرة في قطاعات البناء، والضياف، والمراسى والتجزئة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
