"رمز مشرف للسيدة المصرية".. محمد سامي يكشف سبب تميز منى زكي

أشاد المخرج محمد سامي، بالفنانة منى زكي، وبالموهبة الفنية الكبيرة التي تمتلكها، كما كشف عن سبب اختلافها وتميزها عن فنانات جيلها، مؤكدًا أنها رمز مشرف للسيدة المصرية.

محمد سامي يكشف سبب اختلاف منى زكي عن فنانات جيلها 

وكتب محمد سامي من خلال حسابه الرسمي عبر موقع التواصل الاجتماعي "فيسبوك"، قال: "ليه منى زكي ؟.. كنت بتكلم مع من زكى بسلم عليها و قعدت أتكلم معاها شوية ، و أدخل من موضوع لموضوع و بعد ما قفلت سألت نفسي أكثر من سؤال ، ليه منى زكي فارقة كتير ؟، ليه عندها بريق من نوع خاص ، ليه هي النجمة الأهم و الموهبة الأكبر ، ليه هي سابقة جيلها بفرق كبير جدا رغم إن جيلها قوي و فيه زميلات نجوم حقيقيين علي جميع المستويات وموهوبين و ناجحين و قدموا أعمال مهمة ولكن محدش وصل لأنه يبقى منى زكي".

وأضاف: ليه فضلت من أول يوم ليها كممثلة لحد النهاردة أيقونة يصعب تكرارها أو القرب من حجم إسمها و مكانتها علي المستوى الفني أو علي مستوي النجومية و الموهبة أو حب الجمهور ، ليه منى زكي أكثر ممثلة تصدقها و تتوحد معاها ،ليه لو فكرت في ممثلة تلاقي صورة منى زكي هي أول صورة تيجي في بالك".

وتابع: بإختصار لأن  منى زكي مثقفة متعلمة راقية متطورة مش بتمثل وخلاص ولا بتظهر وخلاص ولا بتتكلم و خلاص ولا مهتمة بتفاصيل الناس الفاضية، ست كلامها مرتب و أسألتها ليها معنى وهدف و أنا بتكلم معاها مابلاقيش لحظه من النقاش دخل في جدل بلا هدف أو كلام من أجل الكلام و خلاص، الست دي وهي بتتكلم عن الفن تحب تسمعها ولما توصف الفن تفرح إنك تنتمي ليه من طريقة كلامها عنه ،لما تناقش معاها أي موضوع تلاقي وعي و حكمة و تحضر وثقافة ، ست ناجحة وزوجة و أم ناجحة، لما تتفرج علي أي مشهد ليها بتلاقيها خلته مش عادي ،بتشوف تحضير ومذاكرة ورؤية و مجهود واضح وعلام وعقل مترتب وده بيبان في أصغر التفاصيل، بتقدم أي مشهد صعب ببساطة و شياكة من غير تصنع او تشتيت".

أردف: "طريقتها في النقد شيك و  تبسيطها لصعوبة أدوار عملتها بيدل علي ثقتها في نفسها اللي بلا حدود، حتى لما نبص للقائتها أو لدورها في المجتمع أو كلامها في ندواتها حتي في الإعلانات اللي قدمتها أو أفلامها و مسلسلاتها او لبسها في أي ظهور ليها حتي لو مش رسمي هتلاقيها بتعرف تنتقي وهتلاقي دايما في جودة ورمز مشرف للست المصرية".

استكمل: بجد الكلام علي عظمة منى زكي صعب يخلص في بوست ، بس حسيت بعد ما قفلت معاها إني عايز أكتب كده من كتر ما استمتعت بالكلام معاها كالمعتاد ، يا بخت الفن المصري و العربي بنجمة النجوم منى زكي، و يابخت كل فنان وفنانه حضرها و نسب لفترة هي فيها ، يا بخت كل زمايلها اللي من جيلها إنهم من جيل منى زكي و يا بخت كل ممثلات الجيل اللي بعدها إنهم عندهم منى زكي يتعلموا منها خاصة إنها جيل أكبر بس عشان بدأت صغيرة إنما مش أكبر منهم سنا بالعكس ما شاء الله عليها قمر و في عز شبابها و محافظه علي شكلها و أناقتها".

أختتم محمد سامي حديثه: "ربنا يديم علي الفن نعمة منى زكي و دايما ناجحة و متفوقة و بتمتعنا بكل دور بتقدمه و كل مشهد بتأديه، بحبك يا عظيمة ياللي حببتينا و لسه بتحبيبنا اكتر في مهنتنا".