رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، قفزة تاريخية في الأصول الأجنبية، وموعد أجازة البنوك في المولد، وهبوط جديد للدولار.
نبدأ مع البنك المركزي .. اللي أعلن إن إجمالي أصوله وصل في آخر يونيو 2025 لـ 6.335 تريليون جنيه، بعد ما كانت 6.057 تريليون السنة اللي فاتت. وده معناه إن وضع البنك المالي قوي وقدرته على إدارة أصوله شغالة كويس.
وبالنسبة للدهب .. قيمته زادت ووصلت لـ 672.9 مليار جنيه بدل 454.9 مليار في يونيو 2024 وكمان أرصدة البنك عند البنوك التانية ارتفعت لـ 1.019 تريليون جنيه، مقارنة بـ 921.7 مليار السنة اللي فاتت.
أما عند صندوق النقد الدولي، فوصلت أرصدة البنك لـ 21 مليار جنيه في يونيو، مقابل 17.8 مليار السنة اللي فاتت .. وده بيوضح إن الأصول بتزيد في كل الجوانب.
ومن قرارات البنك المركزي كمان .. أعلن إن البنوك كلها هتقفل يوم الخميس 4 سبتمبر 2025 بمناسبة المولد النبوي الشريف، وهترجع تشتغل بشكل طبيعي من الأحد 7 سبتمبر.
نروح لسوق الصرف .. الدولار رجع ينزل قدام الجنيه بعد تصريحات قطرية عن استثمارات هتوصل لأكتر من 7.5 مليار دولار على مراحل.
ومن ناحية تانية، مجلس الوزراء قال إن رئيس الوزراء مصطفى مدبولي اتكلم مع رئيس الوزراء القطري الشيخ محمد بن عبد الرحمن آل ثاني عن تفعيل حزمة شراكة بـ 7.5 مليار دولار.
الاتفاقية دي الأساس بتاعها كان في أبريل اللي فات، وفيه كلام إن هيتم الإعلان عن مشاريع معينة خلال الأسابيع الجاية.
وأخيرًا .. الجهاز المركزي للتعبئة والإحصاء أصدر النهارده النشرة الشهرية لبيانات التجارة الخارجية لشهر يونيو 2025. العجز التجاري وصل لـ 4.40 مليار دولار، مقابل 3.56 مليار في نفس الشهر السنة اللي فاتت، يعني زيادة بنسبة 23.4%.
أما الصادرات فزادت بنسبة 4.7% ووصلت لـ 3.50 مليار دولار، بعد ما كانت 3.34 مليار. والزيادة دي راجعة لارتفاع صادرات منتجات زي:
منتجات بترول (14.6%)
ملابس جاهزة (28.8%)
فواكه طازة (47.8%)
عجائن ومحضرات غذائية (23.7%)
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
