خلاص مش هنحتاج نستورد قمح تاني وهنوفر فاتورة كبيرة كانت مصر بترصدها لاستيراد قوت المصريين .. يا ترى إيه اللي مصر بتعمله علشان تأمين رغيف خبز المصريين .. وامتي مصر هتوصل لتحقيق الاكتفاء الذاتي من محصول القمح.
مصر واحد من أكبر الدول في العالم في استيراد القمح وده بياكل نسبة كبيرة من الناتج المحلي والفاتورة اللي مصر بتدفعها لتوفير رغيف الخبر للمصريين كبيرة جدا، وده خلي الحكومة تتحرك وبكل قوة علشان تأمن غذاء المصريين، خصوصا أن قيمة تأمين غذاء المصريين واحدة من أهم قضايا الأمن القومي للدولة المصرية ومفيش اي تراجع عنه مهما الدولة اتكلفت من اعباء .
طيب إزاي مصر هتأمين رغيف خبز المصريين واية هيا خطوات مصر للوصول لتحقيق الاكتفاء الذاتي من محصول القمح ؟.
في أكثر من حاجة الدولة شغالة عليها حاليا لتأمين احتياجات المصريين من محصول القمح أولها التوسع الأفقي في المساحات المزروعة من محصول القمح من خلال استصلاح أراضي جديدة زي الدلتا الجديدة وشرق العوينات وتوشكي، ووصلت المساحات الجديدة اللي اضافتها الدولة للمساحة المزروعة لأكثر من 2.2 مليون فدان من 2014، ده غير مشروعات مستقبل مصر واللي الدولة شغالة عليها حاليا.
المشروعات الجديدة اللي الدولة إضافتها للرقعة الزراعية، خلت مساحة مصر الزراعية ترتفع ل 3.5 مليون فدان مقارنة بـ 3.3 مليون فدان في السنة اللي فاتت، والدولة بتستهدف الوصول إلى ما بين 53–75% اكتفاء ذاتي خلال السنين اللي جاية وفي خطط لزيادة المساحة إلى 12 مليون فدان في 2030.
التحركات الحكومية لتأمين غذاء المصريين تضمنت كمان خطزات مهمة جدا لرفع إنتاجية الفدان وده بيحصل من خلال تطوير أصناف جديدة عالية الإنتاجية واللي زودت إنتاجية الفدان لأكثر من 20 أردب للفدان، ده غير أن بقي مقاوم للأمراض والتغير المناخي، ووفرت الحكومة كمان ندوات ودورات إرشادية للمواطنين بهدف زيادة إنتاجية الفدان.
في نقطة مهمة جدا كمان الدولة اشتغلت عليها لتحقيق الاكتفاء الذاتي من القمح وهيا تطوير البنية التحتية للتخزين والنقل، والدولة نجحت في رفع عدد الصوامع إلى 81 صومعة في 2025، بقدرات تخزينية وصلت ل 3.4 مليون طن مقارنة بـ 1.2 مليون طن في 2014، والحكومة اعتمدت خطة لتجديد 21 صومعة بسعة 530 ألف طن، وحولت 105 شون ترابية إلى هناجر بسعة 211.5 ألف طن، ده غير جهود تطوير النقل سواء كان نقل نهري أو سكك حديدية وصوامع إقليمية لضمان جودة وسرعة التوريد.
الدولة قدمت كمان حوافز للمزارعين لزيادة التوريد ورفعت سعر التوريد إلى 2200 جنيه للإردب في موسم 2025 مقارنة بـ725 جنيه في 2021، وكمان خفضت تكلفة معدات الحصاد إلى 1000 جنية للفدان، واعتمدت خطة لسداد مستحقات الموردين في غضون 48 ساعة، وإنشأت كمان أكثر من 420 نقطة تجميع، ده غير مبادرات التمويل الميسر زي مبادرة دعم بـ 2.5 مليار جنيه بفائدة 5% ومبادرات ازرع لاستهداف صغار المزارعين والهدف منها هو تحفيز المزارعين علي زراعة القمح.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
