قال حسام المندوه: “موضوع أرض أكتوبر يهم كل جماهير نادي الزمالك وتحديد مستقبله، واحنا زي ما قولت قبل كده عقدنا جلسه مع وزير الإسكان ووزير الشباب والرياضة، وعرضنا كل الأوراق اللي تثبت صحة موقفنا”.
تصريحات حسام المندوه
وتابع عبر راديو صوت الزمالك: “إحنا كان عندنا جديه في هذا الملف من وقت تولينا المسؤولية، في آخر 2023 ودي النقطة اللي بنستعجب منها في بيان وزارة الإسكان، في أول جمله فيها وهي إن مهلة بناء الأرض انتهت بنهاية عام 2023 اللي هو أصلا إحنا لسه كنا جايين فيه”.
وواصل: “مفيش كده منطقية لأي حاجه دارت بينا وبين الوزارة من طلبات وقرارات وزارية خرجت، أنا قدمت للوزارة في شهر أربعة في 2024، ودفعنا الرسوم واتوافق لينا وعملنا الاتفاقات كلها بعد 2023 أصلا”.
وأضاف: “احنا معانا كل الورق اللي يثبت صحة موقفنا، وإحنا خدنا موافقات إلى نهايه 2026 وخدنا مهلة إضافية”.
وزاد: “في حاجه مش منطقية ومش طبيعية علشان كده ناشدنا رئيس الجمهورية، مش علشان يدخل لنادي الزمالك، لأ علشان في مشكلة كبيرة لأننا عملنا اتفاقيات وعقود وفلوس ادفعت ده، كله بناء على الموافقات والجوابات اللي معانا”.
أزمة أرض فرع الزمالك في 6 أكتوبر
وأشار: “احنا في مأزق كبير جدا جدا، لأن الأرض دي لو اتسحبت نقفل كل حاجه بقى، لو كل قطرة مياه تساوي حياة، أرض أكتوبر تساوي حياة الزمالك، ولو الأرض مرجعتش هينهار”.
وأكد: “اتفقنا على تقديم تظلم فيه كل المعلومات وفيه كل البنود وفيه كل التفاصيل والموافقات اللي معانا، وتسلسل الأحداث وتقديمها لوزارة الإسكان، اللي بدورها هترفعها لمعالي رئيس الوزراء، واللي أنا واثق إنه لو تم عرضه على فخامة الرئيس هيكون في كلام اخر”.
وأتم: “نحن لم نتعاقد مع أي أفراد لا هنبني فنادق ولا مول ولا غيره، رغم إنه يحق لينا عادي جدا، إحنا كل تعاقدتنا مع مؤسسات وكيانات مالية كبيرة، احنا ورقياتنا وتعاقدتنا كلها لصالح نادي الزمالك”.
