كشفت السيدة وفاء، حفيدة الزعيم الراحل أحمد عرابي ووالدة زوجة المتهم في واقعة الاعتداء على زوجة شقيقه بمحافظة الشرقية، تفاصيل جديدة عن الأزمة التي أثارت ضجة كبيرة خلال الساعات الماضية، مؤكدة أن ما حدث كان نتيجة تراكمات وخلافات عائلية سابقة، فيما لا تزال التحقيقات مستمرة ولم يتم التصالح حتى الآن.
وقالت وفاء في تصريحات خاصة لـ"مصر تايمز": "الموضوع لسه ما اتحلش، لكن أصل المشكلة خلافات على الأولاد، زي معظم مشاكل البيوت، كان فيه خلافات قديمة واتعملت جلسة عرفية قبل كده، واتفقنا لو حد أهان التاني، الطرف التاني يسجل له، اللي حصل إن المعتدى عليها أسماء جمال شتمت محمد جوز بنتي، فمحمد كان واقف يصورها علشان يسجل السب ، راحت هي شدت منه التليفون وطلعت تجري، فجري وراها وحصل اللي حصل".
وأضافت: "أسماء بنتي كانت لسه راجعة من الشغل، أول ما سمعت الصوت نزلت تشوف في إيه، لكن اتورطت في القضية ظلم، لو لاحظت الفيديو، هتلاقيها نازلة من فوق لأن الكاميرات قدام شقتها، ومحمد كان بيصور قدام شقته فى الدور العلوى والموبايل لسه مع المعتدى عليها لحد دلوقتي".
وأوضحت أن الواقعة جاءت نتيجة مشاكل متراكمة قائلة "الخناقات دي بقالها فترة بسبب الورث والأولاد، حتى أخوهم التالت عبدالله اتأذى من كتر مشاكلها معاه لدرجة قالوا هيأجروا شقق بره عشان يخلصوا من المشاكل".
وحول الإجراءات القانونية، أكدت "محمد اتحبس أربعة أيام على ذمة التحقيق، لكن بنتي أخدت إخلاء سبيل لأنها مالهاش علاقة بالاعتداء وكانت لابسة لبس الشغل وقتها. الناس كلها في الشارع شهدوا إنهم محترمين".
واختتمت تصريحها بالتأكيد على أن القضية ما زالت في أروقة النيابة، موضحة أن المعتدى عليها سبق وصدر ضدها حكم بالحبس سنة في قضية ضرب، وقالت: "محمد سلم نفسه بعد ما الفيديو انتشر، وهو راجل متعلم ومعاه بكالوريوس لغة عربية وصاحب كافيه معروف".
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
