أكد شريف فتحي وزير السياحة والآثار أن إجراءات الوزارة تجاه الشاب عبد الرحمن صاحب فيديو المتحف الكبير صحيحة 100% مشيرا إلى أن الشاب ارتكب خطأ لا يمكن التغاضي عنه.
وقال في مداخلة مع برنامج "على مسؤوليتي" المذاع على قناة "صدى البلد": "مش كل واحد تقوم في دماغه يعمل حاجة يروح يلطش شمال ويمين ويجي عامل الحاجة دي مينفعش وبعدين لما تيجي الوزارة أو المتحف ياخد إجراءه في هذا الموضوع، اللي هو صحيح 100%، وأي واحد يقول غير كده ما فهمش الموضوع ده خالص".
وأضاف: "طبعًا في ناس بتقول لك إن الوزارة كان لازم تصبر، كان لازم تكلمه كلمة لكن لما تبقى حاجة بتاعتي أنا شخصيًا ولم يتعدَّ على حقوق الآخرين، أقول له يا حبيبي تعالى نعمل مش عارف إيه والكلام ده كله ده كلام فاضي".
وتابع: "في الشغل المؤسسي في حقوق وواجبات والتزامات قانونية اللي عملته الوزارة وعمله المتحف صح 1000% لا الموضوع ده ما فيهوش معلش، إحنا بنتكلم هنا على قانون".
وواصل: "عشان كده أنا بقول، في اللي أنا شفته امبارح وخلاني أتكلم في الموضوع النهاردة، إن هناك جبهة معلش لا تُسمن ولا تُغني من جوع دي كده عندنا فنجال صغير نقعد نتكلم فيه ونقعد نشجب ونعمل ونتكلم ونقول معلش ومش عارف إيه".
وأوضح: "في حاجات اسمها مسؤوليات دولية لازم تقوم بيها ويكون عندك ملفات قانونية صحيحة الموضوع مش لعبة صغيرة".
وأكمل: "أنا متأكد إن في ناس كتير ما شافتش الفيديو يعني النهاردة إحدى رئيسات تحرير الصحف لما شافته قالت: أنا ما شفتش حاجة، ده موضوع ركيك".
واختتم: "الفكرة النهاردة إننا لما نيجي نقول، أنا برضه مش ضده، أتمنى إنه يكون من المبدعين بس عشان ابني ده أبنيه صح وأخليه يبقى كويس، لازم أقول له عشان تبقى كويس لازم تعمل إيه الموضوع مش موضوع قص ولزق واعمل وسوي وبتاع".
