يا ترى هي ليه الفضة مكملة في الصعود والطلب عليها بيزيد يوم ورا التاني، إيه اللي بيحصل في المعدن الأبيض، وإيه الأسباب اللي مخلياه يجذب المستثمرين والصناعة في نفس الوقت؟
في السوق المحلي عندنا في مصر، أسعار الفضة ثابتة تقريبا، يعني جرام الفضة عيار 800 حوالي 51 جنيه وربع وعيار 925 حوالي 59 جنيه وربع، أما عيار 999 اللي هو النقي جداً، فواصل ل 64 جنيه، وجنيه الفضة بيوصل 474 جنيه.
لكن بره مصر، فالوضع مختلف، لأن الأوقية عالمياً قفزت ل 38.46 دولار بزيادة يومية 1.5%، وده في وقت الدولار الأمريكي نفسه بدأ يضعف بعد بيانات التضخم اللى طلعت أقل من المتوقع في أمريكا، وده زود التوقعات إن الفيدرالي هيخفض الفايدة قريب.
كمان، الفضة مش بس معدن للزينة أو الادخار دي كمان عنصر أساسي في الصناعة خاصة في الألواح الشمسية والإلكترونيات، وده مخلي الطلب الصناعي عليها في أعلى مستوياته من سنين، والسوق أصلا بيعاني من عجز في المعروض للعام الخامس على التوالى.
ومن الناحية الاستثمارية، فصناديق الاستثمار اللى بتشتغل في الفضة ضخت أكتر من 95 مليون أونصة في نص السنة الأول بس، وده بيأكد إن المؤسسات الكبيرة شايفة مستقبل المعدن الأبيض إيجابي جدا.
ولو بصينا على نسبة الدهب للفضة، فهنلاقيها حوالي 87.6، وده معناه إن الفضة أدائها أحسن نسبيا من الدهب الفترة الأخيرة ولسه في مجال إنها تقل النسبة دي أكتر لو الطلب الصناعي كمل في الزيادة.
والخلاصة، هي ان الفضة ماشية على خطين هما ضعف الدولار وتوقعات خفض الفايدة من ناحية، وطلب صناعي قوي من ناحية تانية، وده بيخليها مرشحة تكمل صعود في الفترة الجاية سواء للمستثمرين أو للصناعة.
غير كده، في دول كتير بدأت تركز على تخزين الفضة كجزء من احتياطياتها مش بس الدهب، وده بيجي زي خطوة تحوط ضد أي أزمات اقتصادية أو تقلبات في أسواق العملات، ولو الخطوة دي لو انتشرت أكتر هتزود الطلب العالمي على المعدن الأبيض.
بردو، التطور في صناعات الطاقة النظيفة زي السيارات الكهربائية والأجهزة الذكية واللي بيستخدم الفضة في مكوناته الأساسية، بيخلي الطلب عليها مرتبط بشكل مباشر بالمستقبل التكنولوجي والتحول للطاقة الخضراء.
وعلى الجانب السياسي بقى، فاي توترات أو حروب تجارية ممكن تدفع المستثمرين يلجأوا للفضة زي ما بيحصل مع الدهب خاصة إنها أرخص، فبتكون فرصة كويسة للناس اللي عايزة ملاذ آمن بس برأس مال أقل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
