منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. والبداية بتقرير عن 9 شركات صينية وتركية تضخ استثمارات جديدة في مصر.. ما التفاصيل؟
قال التقرير، إن المنطقة الحرة بالإسماعيلية، استقبلت استثمارات جديدة ضخمة من 9 شركات، منهم شركات صينية وتركية، والتكلفة الاستثمارية دي وصلت لحوالي 41.6 مليون دولار.. والمشروعات دي هتكون في مجالات مهمة جدًا زي الغزل والنسيج، والملابس الجاهزة، وملابس الحماية، وحتى الألعاب الرياضية، وكمان تصنيع قطع غيار أجهزة التدفئة والسباكة، يعني احنا بنتكلم عن صناعات مطلوبة جوة مصر وبره، ودي نقطة قوة كبيرة.
وأضاف التقرير، أن المشروعات دي هتوفر حوالي 16 ألف فرصة عمل مباشرة! 16 ألف أسرة هيكون ليهم مصدر رزق جديد، وده غير فرص العمل غير المباشرة اللي هتيجي من ورا الخدمات والموردين والنقل وغيره.
وأوضح تقرير بانكير، أن حسام هيبة، رئيس هيئة الاستثمار، قال إن اللي بيحصل ده دليل على نجاح الدولة في تهيئة بيئة أعمال جاذبة للمستثمرين، ووضح إن الشركات اللي في قطاع الغزل والنسيج دي هتصدر كل إنتاجها بره، وده جزء من استراتيجية "الاستثمار من أجل التصدير"، اللي هدفها ندخل عملة صعبة للبلد ونقوي الاقتصاد، الإنتاج الفعلي للمصانع دي متوقع يبدأ في 2026، يعني إحنا مش بنتكلم عن حلم بعيد، لأ… خطوات محسوبة وجداول زمنية واضحة.
وأشار التقرير إلى أن المستثمرين الأجانب، اللي جايين من الصين وتركيا، أشادوا بالإجراءات السهلة والبيئة الجاذبة هنا، وقالوا إنهم ناويين ينقلوا خطوط إنتاج كبيرة لمصر، وده معناه إن مصر هتبقى مركز إقليمي للتصدير وإعادة التصدير، والميزة الكبيرة إننا داخلين أسواق عالمية باتفاقيات تجارية بتدينا أفضلية على منافسين كتير.
منصات بانكير قدمت تقرير مختلف النهاردة عن خطة الحكومة لتصنيع 100 ألف سيارة كهربائية في مصر.
قال التقرير، إن الصناعات الخضراء واحد من أهم الأهداف اللي الحكومة بتسعي للتوسع فيها، خصوصا انها المستقبل والعين كلها عليها وده التوجه العالمي اللي جاي وهو الاقتصاد الأخضر واللي بيكون هدفه الأساسي هو الحفاظ علي البيئة وتقليل استخدام الوقود الكربوني والديزل، واحدة من الصناعات دي هيا صناعة السيارات الكهربائية واللي مصر بقي عندها هدفها أنها توطنها في مصر وكمان تكون واحدة من الدول الرائدة في تصديرها.
واستعرض تقرير بانكير، أهم النقاط والخطط اللي اتكلم فيها الدكتور مصطفى مدبولي، واللي منها توطين صناعة السيارات، وخطة مصر لتصنيع 100 ألف سيارة كهربائية سنويا، كواحدة من خطوات الحكومة للتحول للطاقة النظيفة وتقليل الانبعاثات الكربونية.
وأوضح التقرير، أن خطة الحكومة لتوطين صناعة السيارات الكهربائية في مصر جاية بناء توجيهات القيادة السياسية بتوطين صناعات السيارات بمختلف أنواعها في مصر خصوصا السيارات الكهربائية، وعلشان كده الحكومة حطت استراتيجية متكاملة لدعم صناعة السيارات الكهربائية بتشمل توطين الصناعة وتحفيز الاستثمار المحلي والأجنبي في صناعة السيارات بمختلف أنواعها.. ومن أهم الخطوات اللي الحكومة أخدتها، هي إعادة إحياء شركة النصر للسيارات بهدف إنتاج أول سيارة كهربائية مصرية بالتعاون مع شركات عالمية رائدة .
وكشف التقرير، أنه من ضمن خطط الحكومة كمان، هو التوسع في إنشاء وبناء بنية تحتية قوية بتضم أكثر من 1000 محطة شحن كهربائي في أنحاء الجمهورية في المرحلة الأولى، وكمان الدولة أطلقت عدد كبير من الحوافز للمواطنين لتشجيع الناس علي شراء السيارات الكهربائية من خلال طرح تخفيضات جمركية كبيرة علي واردات السيارات الكهربائية وإطلاق دعم مادي للسيارات الكهربائية محلية الصنع ونشر ثقافة الاستدامة والتكنولوجيا الخضراء.
وحدة أبحاث بانكير قدمت تقرير خاص النهاردة عن سر تراجع الذهب وتوقعات الأسعار.
كشف تقرير بانكير، أن السبب الرئيسي في تراجع سعر الذهب، هو تراجع الدولار قدام الجنيه، يعني القوة الشرائية للعملة الأمريكية ضعفت شوية، كمان في تقارير طلعت من أمريكا عن التضخم، اللي قالت إن الأسعار بتزيد بمعدل أبطأ من المتوقع، وده خلا الفيدرالي الأمريكي يفكر جديا يخفض الفايدة في اجتماعه الجاي في نص سبتمبر الجاي، وطبعا أي خفض للفايدة بيضغط على الدولار ويقوي موقف الدهب.
وأوضح التقرير، أن السوق المصري ما استفادش من صعود الأوقية، والسبب إن لما الدولار نفسه بينزل فالدهب عندنا بيخسر الدعم اللي كان بياخده من قوة العملة الأمريكية، فحتى مع صعود عالمي فالسعر هنا ممكن يهبط.
وعدد التقرير، أسباب هبوط الدهب، واللي منها الأحداث السياسية والتجارية في العالم لأنها بتأثر جامد على الدهب، زي المفاوضات التجارية بين أمريكا والصين أو أي قرارات تخص الرسوم الجمركية على المعادن، فكل ده بيحرك السوق في ثانية.. ده غير أن فيه بنوك مركزية في دول كتير بقت بتشتري دهب بكميات ضخمة كنوع من التحوط ضد الأزمات الاقتصادية والسياسية، وده بيزود الطلب ويضغط على الأسعار لفوق، فعشان كده أى خبر عن شراء أو بيع كميات كبيرة من الدهب بيكون له تأثير فوري على السوق.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
