أكد الإعلامي أحمد موسى أن حريق سنترال رمسيس تسبب في مشكلات واسعة في قطاع الاتصالات متسائلا عن أسباب عدم وجود بديل في حالات الطوارئ.
وقال موسى خلال برنامج "على مسؤوليتي" المذاع على قناة "صدى البلد": "بعض المواقع الإخبارية تعطلت، فيها مشاكل أيضا، وبالتالي شوفوا لما بيحصل حدث لكن إحنا المفروض في حاجة اسمها التبادلي، يعني لو حصل لا قدر الله حاجة زي كده، أكيد يبقى عندي بديل".
وأضاف: "عندنا في الاتصالات ده بديل ولا ما عندناش؟ مش عارف، يعني ما عنديش المعلومة، ولكن أكيد لازم يبقى عندي بديل وارد يحصل حريقة؟ وارد، وارد جدا طب لازم عندي بديل آخر، أقدر على طول أدخل على الشبكة، وأقدر على طول أشتغل".
وتابع: "يعني أتمنى المسؤولين عن الاتصالات في مصر يقدروا يقولوا الحكاية، ويقدروا يقولوا لنا الخدمات اللي اتأثرت قد إيه، وكمان فرق الدعم الفني اللي هي النهارده، أو حاليا، بتتعامل مع الموقف ميدانيا، وبتتعامل مع الأعطال اللي موجودة على الشبكات المختلفة لإعادة الخدمة مرة أخرى إلى كل المواطنين الذين تأثروا نتيجة لهذا الحريق، الذي اندلع قبل ساعتين من الآن، في المبنى الرئيسي لسنترال رمسيس بوسط القاهرة".
وأوضح: "زي ما إحنا بنتابع، لحظات طبعا الأولى لهذا الحريق، ويمكن طبعًا سلطات الدفاع المدني والحماية المدنية تواصل عملها على طول، بسرعة، لأنه أماكن خاصة بالدفاع المدني قريبة جدا من هذا المكان، فيها مكان قريب جدًا، العتبة قريبة جدًا، وأعتقد في جنب دار القضاء العالي كمان، كان فيه أيضًا الأجهزة أو عربيات الحماية المدنية موجودة، ويمكن يكون في المبنى ده، في أعتقد عربية جنبه، يعني جنب المبنى ده في آخره كده فيه عربية قبل نقابة المهندسين، فيه عربية حماية مدنية كانت بتبقى دايمًا واقفة، فأتمنى أيضًا، لأن كل ده بيساعد".
وذكر: "حريق كبير جدًا، لأنه حريق كمان بدأ ينتشر في يعني عدد من الطوابق، زي ما إحنا شايفين طبعًا قدام حضراتكم طبعًا كثير من طبعًا التساؤلات".
