يا ترى ليه الدهب استقر في الساعات الأخيرة، وهل الاستقرار ده معناه إن الأسعار هتثبت ولا في مفاجآت جاية؟..
اللي متابع السوق كويس، هيلاحظ إن أسعار الدهب في مصر والعالم تقريبا سكتت شوية، و"جرام 21" واقف عند 4565 جنيه، وده نفس سعر إغلاق امبارح، أما الأوقية عالميا، فهي حوالى 3325 دولار، يعني فيه هدوء بس الكل كان مستني القرار اللي ممكن يقلب الموازين.
طب ليه السوق هادي؟
السبب الرئيسي هو إن المستثمرين كانوا مستنين يشوفوا الفيدرالي الأمريكي هيعمل إيه في اجتماعه امبارح، هل هيخلي الفايدة زي ما هي ولا فيه نية للخفض، لكنه ثبت أسعار الفايدة.
وفعلا الفايدة فضلت زي ما هي، بين 4.25% – 4.5%، وفي نقطة مهمة كمان وهي إن الدولار الأمريكي بدأ يضعف شوية، ونزل ل98.77 بعد ما كان وصل ل 99.14، وده بيدي دفعة للدهب، لأن لما الدولار يضعف فالناس بتروح للدهب كملاذ آمن.
وبرغم تحسن شهية المستثمرين شوية بسبب الاتفاقيات التجارية بين أمريكا واليابان والاتحاد الأوروبي، لكن لسه في حالة حذر وده بيخلؤ الناس تلجأ للدهب كتحوط خاصة مع التوترات العالمية والمخاطر الجيوسياسية.
كمان، في متغيرات تانية كمان هتأثر على أسعار الدهب الأيام الجاية، زي اجتماع البنك المركزي الياباني، وبيانات التوظيف الأمريكية، ومؤشر أسعار نفقات الاستهلاك الشخصي.
يعني الخلاصة، الدهب دلوقتي هادي بس تحت السكون ده فيه ترقب كبير، وأي كلمة من الفيدرالي أو باول ممكن تغير الاتجاه تماما، كمان اجتماع البنك المركزي الياباني، وبيانات التوظيف الأمريكية هيغير الموازين، وممكن نشوف أسعار الدهب قريب جدا طايرة في السما.
لكن خلينا ناخد بالنا من حاجة مهمة، وهب ان رغم إن الأسعار ثابتة دلوقتي، إلا إن فيه فرق كبير بين سعر الدهب في السوق المحلي وسعره العالمي، والفرق ده بيرجع لعوامل داخلية زي سعر صرف الجنيه مقابل الدولار، وكمان العرض والطلب في السوق المصري، يعني ممكن الأوقية عالميا تفضل ثابتة، لكن الجرام في مصر يتحرك فجأة لو حصلت تغييرات داخلية.
ومن ناحية تانية، فيه ناس بتسأل: هل الوقت ده مناسب للشراء، والإجابة ببساطة هي إن اللي بيشتري دهب كتحويشة أو استثمار طويل المدى، ممكن يعتبر الوقت ده فرصة، خاصة إن الأسعار لسه مستقرة ومفيش طفرات قوية، لكن لو ناوي تشتري وتبيع على المدى القصير، يبقى لازم تتابع الأخبار الاقتصادية أول بأول، لأن السوق ممكن يتحرك في أي لحظة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
