رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تطور مهم فى سعر الدولار، وشركة عالمية تضغ استثمارت في مصر، واتفاقية مهمة لبنك مصر.
نبدأ مع سوق صرف العملات الأجنبية.. والدولار نزل بشكل ملحوظ في تعاملات الصبح في البنوك، ووصل لأقل من 49 جنيه للشراء والبيع، وده بسبب تحسن تدفقات العملة الصعبة واستقرار السوق شوية.
البنك العربي الأفريقي الدولي وبنك HSBC سجلوا سعر شراء 48.85 جنيه، وبيع 48.95 جنيه، ونفس الأسعار كانت في بنك مصر والبنك الأهلي.
أما المصرف المتحد وبنك فيصل الإسلامي فسجلوا شراء عند 48.82 وبيع 48.92 جنيه، وبنك الإسكندرية وCIB سجلوا 48.83 جنيه للشراء و48.93 للبيع.
وفي بنك QNB، سعر الشراء كان 48.81 جنيه، والبيع 48.91 جنيه.
ونروح لوزارة البترول..المهندس كريم بدوي، وزير البترول، استقبل في العلمين الجديدة وفد كبير من شركة شل العالمية، برئاسة سيدريك كريمرز، رئيس أنشطة الغاز في الشركة، ومعاه داليا الجابري رئيسة شل مصر، وعزة شلباية مسؤولة العلاقات المؤسسية.
الاجتماع كان لمتابعة استثمارات شل في الغاز الطبيعي في مصر، خصوصًا في منطقة غرب الدلتا العميق. ناقشوا نتائج المرحلتين العاشرة والحادية عشرة، واللي بدأ فيها الإنتاج من المرحلة 11 فعليًا.
كمان ناقشوا خطط التوسع والمراحل الإنتاجية الجاية، ومحاولات اكتشاف مناطق جديدة واعدة.
ومن ضمن الكلام اللي اتقال، شافوا إزاي مصر ممكن تبقى مركز إقليمي للطاقة، خاصةً مع مشروع حقل أفروديت في قبرص اللي بتستثمر فيه شل، وبيخططوا ينقلوا إنتاجه لمصر علشان يستفيدوا من البنية التحتية هنا، زي مجمع إدكو للغاز المسال، اللي يعتبر من ركائز الدور المصري في الطاقة.
نروح لبنك مصر.. بنك مصر مضى بروتوكول تعاون مع منصة "دوبيزل مصر"، واللي بتعتبر من أكبر المنصات للإعلانات المبوبة في البلد، وده علشان يسهلوا على الناس الحصول على التمويل العقاري.
الاتفاق بيتيح للناس يعرفوا التمويل اللي ممكن يحصلوا عليه ويتواصلوا مع البنك بشكل مباشر من على المنصة.
البنك بيحاول من خلال البروتوكول ده يدعم الاقتصاد الوطني، ويحقق رؤية مصر 2030، وكمان يسهل على الناس اللي عايزين يشتروا شقق أو وحدات سكنية إنهم يلاقوا حلول تمويل مناسبة ليهم، بشكل رقمي وبسيط.
الاتفاق كمان بيستهدف الترويج للعقارات المصرية إقليميًا ودوليًا، وبالذات للمصريين اللي شغالين بره، وكمان لجذب الاستثمارات الأجنبية للقطاع العقاري.
وأخيرًا نروح لسوق الذهب النهارده، أسعار الذهب نزلت في السوق المحلية رغم إن الأوقية عالمياً كانت مستقرة. السبب في كده إن في تحسن في شهية المخاطرة بعد اتفاق تجاري بين أمريكا والاتحاد الأوروبي، وده قلل من الطلب على الذهب.
سعيد إمبابي، المدير التنفيذي لمنصة "آي صاغة"، قال إن الذهب نزل حوالي 30 جنيه عن أسعار يوم السبت اللي فات، وسجل عيار 21 حوالي 4600 جنيه للجرام، والأوقية فضلت عند 3337 دولار.
عيار 24 وصل لـ5257 جنيه، وعيار 18 سجل 3943 جنيه، وعيار 14 بـ3067 جنيه، أما الجنيه الذهب فسجل 36800 جنيه.
وأضاف كمان إن الذهب نزل الأسبوع اللي فات حوالي 20 جنيه، من 4650 لـ4630 للجرام، مع تراجع بسيط في الأوقية عالميًا بنسبة 0.4%.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
