منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. والبداية بتقرير عن سر هبوط الذهب في مصر رغم ارتفاعه عالميا.
قال التقرير، إنه في وقت العالم كله واقف فيه على حافة أزمة اقتصادية جديدة، والدهب بره بيكسر أرقام قياسية، السوق المصري عامل عكس الدنيا كلها.. الناس هنا مش فاهمة: ليه الأسعار بتنزل؟ وده معناه نشتري ولا نستنى؟.. مفارقة غريبة بين بره وجوه، الأونصة عالميا عدت الـ 3400 دولار، وده رقم تاريخي.. بس في مصر، جرام 21 نزل وبقى حوالي 4710 جنيه، بعد ما كان أعلى من كده بأكتر من 25 جنيه.. و24 كمان نزل لـ5383 جنيه.
وكشف تقرير بانكير، أن اللي بيحصل أن الطلب قل جدا، والناس مستنية الأسعار تنزل أكتر، فبطلوا يشتروا، ولما الطلب يقل، التجار يقللوا الأسعار علشان يحركوا السوق.. كمان الجنيه ثابت قدام الدولار,, ومفيش تغيرات كبيرة في سعر الدولار، فده خفف الضغط على أسعار الدهب.. مش بس كده، ده التجار بقوا يصدروا الدهب بره، بسبب إن الأسعار بره عالية، التجار فضلوا يبعوه للخارج، وده زود المعروض جوا مصر، فالسعر قل.
وأكد التقرير، أن ممكن نشوف انخفاض بسيط كمان، لكن مع دخول الشتاء والمناسبات، الناس هتبدأ تشتري، والأسعار ممكن تطلع تاني شوية بشوية.
منصات بانكير قدمت تقرير مختلف النهاردة عن بدائل الحكومة للحصول على قروض بدلا من صندوق النقد الدولي.
أكد التقرير، أن الفترات اللي فاتت والتخبطات اللي حصلت بين الحكومة وصندوق النقد الدولي اثبت وبالتأكيد أن العلاقة بين الطرفين انتهت للأبد وده اللي اكده الدكتور مصطفى مدبولي رئيس مجلس الوزراء لما قال إن مصر مش هتاخذ اي قروض جديدة من صندوق النقد الدولي تاني وأنه مع نهاية الحصول على شرائح قرض الـ8 مليار دولار واللي مصر حصلت علي موافقته وصرفت منه 4 شرائح مش هيحصل تعاون تاني بين الحكومة المصرية وصندوق النقد الدولي.
وأضاف التقرير، أنه واحد من أسباب انتهاء العلاقة بين صندوق النقد الدولي والحكومة المصرية هيا الشروط الصعبة واللي صندوق النقد تمسك بيها أكثر من مرة لصرف شرائح القرض، خصوصاً أن أغلب الشروط متعلقة برفع وتخفيض الدعم، وللاسف تنفيذ الشروط دي جاي في وقت العالم كله بيعاني من تحديدات وتوترات جيوسياسية واقتصادية غير مسبوقة والتحديات دي أثرت علي مصادر الدخل الرئيسية لمصر زي قناة السويس واللي إيراداتها تأثرت باكثر من 70% عن الإيرادات اللي كانت بتحققها القناة في السنين اللي فاتت ووصلت معدلات الخسائر اللي حققتها القناة لأكثر من 7 مليار دولار، ده غير الخسائر اللي موجودة في عدد كبير من قطاعات الدولة خصوصا قطاع السياحة واللي كان مرشح أنه يعمل ارقام اعلي من الأرقام اللي تحقتت بكثير .
وكشف تقرير انكير، أن كل اللي حصل ده خلي الحكومة تبدأ تدور علي مصادر بديلة للتعاون مع مصر وصرف قروض بشروط ميسرة والبحث اتجه إلى تحالف بريكس واللي مصر عضو فيه، وفعلا الحكومة خاطبت صندوق التنمية الجديد لصرف قروض لمصر، وفي حاليا مناقشات بين الحكومة وبعثة البنك علشان يوصلوا لاتفاق للحصول على القروض.
وحدة أبحاث بانكير قدمت تقرير خاص النهاردة عن أولويات الحكومة علشان نبني برنامج إصلاح اقتصادي قوي.
كشف التقرير، أن الفترة اللي فاتت أثبتت أن البرنامج الاقتصادي المصري للاسف كان برنامج هش وسهل جدا يقع مع بداية أي أزمة عالمية وده اللي حصل مع بداية وجود توترات وتحولات اقتصادية وجيوسياسية في العالم كله أهم مصدرين للدخل الدولاري لمصر من الخارج وقعوا منا وبالتالي الاقتصاد المصري تأثر بشكل سلبي.
وأكد التقرير، أن اللي حصل خلال السنين اللي فاتت خلي الحكومة تعيد حساباتها بشكل كامل في الاقتصاد المصري وتحط خطط أنها تبني الاقتصاد المصري من اول وجديد.
وأوضح تقرير بانكير، أن الحكومة في الوقت اللي جاي حطت أولويات كتيرة علشان تعيد بناء الاقتصاد المصري اول بنود إعادة بناءً الاقتصاد القومي المصري كانت تحفيز النمو الاقتصادي وتنويع مصادر الدخل من خلال دعم القطاعات الإنتاجية زي الزراعة والصناعة والسياحة والخدمات اللوجستية والاقتصاد الرقمي، وتقليل الاعتماد على الموارد التقليدية زي النفط والغاز وشغالة علي على تنويع مصادر الدخل القومي لتحقيق الاستدامة..
تاني الخطوات اللي الحكومة شغالة عليها هيا تحسين بيئة الاستثمار وتعزيز الشراكة مع القطاع الخاص وتهيئة بيئة استثمارية جاذبة من خلال تسهيل الإجراءات الإدارية وتعزيز الشفافية ومكافحة الفساد وتشجيع الاستثمار المحلي والأجنبي، ودفع القطاع الخاص علشان يكون شريك أساسي في التنمية.
ثالث خطوات هيا الاهتمام برأس المال البشري. في السنين اللي فاتت الحكومة توسّعت في برامج التعليم والتدريب المهني وتحويل التعليم علشان يخدم احتياجات سوق العمل، وكمان أطلقت برامج لتشجع ريادة الأعمال والمشروعات الصغيرة والمتوسطة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
