بعد زيارة ترامب للسعودية.. أسعار الذهب بتنهار (يا ترى إيه السبب)؟

يا ترى إيه اللي خلّى أسعار الذهب تنهار فجأة في الأسواق العالمية؟ وليه السوق بقا مش مستقر وكل شوية طالع نازل؟  .. وهل زيارة دونالد ترامب للسعودية ولا استثمارات بمئات المليارات من الدولارات اللي حصل عليها ليها علاقة باللي بيحصل؟

الدهب من زمان هو الملاذ الآمن للمستثمرين.. يعني لما الاقتصاد العالمي يترنح أو فيه توترات سياسية .. الناس بتجري تشتري دهب .. لأنه بيحافظ على قيمته .. لكن اللي حصل بعد زيارة ترامب للسعودية  قلب الموازين .. تخيّل إن السعودية أعلنت عن استثمارات مباشرة مع أمريكا بقيمة تتخطى 400 مليار دولار .. الصفقة دي مش بس أرقام .. دي زلزال اقتصادي بمعنى الكلمة.

الاستثمارات دي بتغطي مجالات كبيرة زي الطاقة المتجددة والتكنولوجيا والدفاع .. يعني ببساطة .. السعودية بتقول لأمريكا: "إحنا معاكم .. وهنضخ فلوس كتير في اقتصادكم" .. والنتيجة كانت ان ثقة المستثمرين في الاقتصاد الأمريكي زادت بشكل كبير .. والدولار الأمريكي قوّى .. وهنا بقى نقطة مهمة لما الدولار يقوى .. الدهب عادةً بيضعف لأن الدهب بيتم تسعيره بالدولار .. فلو الدولار غالي .. الناس بتبقى محتاجة فلوس أقل عشان تشتري نفس الكمية دهب.

في الساعات اللي أعقبت زيارة ترامب .. سعر الأونصة العالمية نزل من حوالي 3240 دولار لـ 3180 دولار تقريبًا .. يعني خسارة كبيرة في وقت قصير .. وده كان بسبب إن المستثمرين حسوا إن الاقتصاد العالمي ممكن يستقر مع الصفقات الضخمة دي .. فبدل ما يشتروا دهب .. بدأوا يستثمروا في الأسهم والسندات الأمريكية .. وفي نفس الوقت .. سياسات ترامب الاقتصادية زي تقليل الضرايب وتشجيع الإنتاج المحلي خلّت الأسواق تشوف إن الدولار هيبقى أقوى في المستقبل.

طب وفى مصر؟

في مصر .. الوضع كان مختلف شوية .. أسعار الهب هنا بتتأثر بسعر الدولار في وسعر الدهب العالمي .. بعد الانهيار العالمي .. سعر الجرام عيار 21 نزل حوالي 50 جنيه في يوم واحد .. لكن المشكلة إن العرض والطلب في السوق المصري لسه مضطرب .. يعني ممكن تشوف أسعار مختلفة من محل لمحل .. وده بيخلّي المستثمر المصري في حيرة: هل يشتري دلوقتي ولا يستنى؟

طب  أسعار الدهب رايحة على فين؟

فيه خبراء بيقولوا إن الانهيار ده ممكن يكون مؤقت ..  لأن فيه توترات جيوسياسية لسه موجودة .. زي الصراعات في الشرق الأوسط والتوتر بين الصين وأمريكا .. لو حاجة من دي زادت الدهب ممكن يرجع يقفز تاني .. لكن لو استثمارات السعودية وغيرها بدأت تترجم لنتايج ملموسة زي نمو اقتصادي قوي .. يبقى الدهب ممكن يفضل تحت الضغط فترة .. فيه تقرير من مجلس الدهب العالمي بيقول إن الطلب على الدهب في آسيا لسه قوي .. فده ممكن يدعّم الأسعار على المدى الطويل.