هو ليه أسعار السيارات والسلع مش بتنزل بشكل ملحوظ مع انخفاض أسعار الدولار على مدار الأسابيع اللي فاتت.. وهل ممكن نشوف انخفاض قريب..
الدولار ليه فترة بينزل وانخفض في اخر 4 اسابيع لحوالي 162 قرش من أعلي سعر 52 جنيه إلى 50.38 جنيه في اخر تعاملات ودا مؤشر مهم على توافر الدولار في البنوك واستمرار التدفقات الدولارية الكبيرة..
طيب سؤال بيفرض نفسه ليه الأسعار مش بتنزل خاصه في السلع المستوردة زي السيارات والسلع الأساسية ؟.
معروف أن مصر بستورد دلوقتي اغلب السيارات من الخارج بجانب قطع الغيار والسلع الأساسية زي الزيوت والقمح وغيرها و المستوردين بيعتمدوا بشكل أساسي على الاستيراد بالدولار الأمريكي وطبيعي لما سعره يرفع أسعار السيارات والسلع المستوردة هترفع ودا شفناه في الفترة الأخيرة وتحديدا من فبراير 2022 مع اندلاع الحرب الروسية الأوكرانية وظهور أزمة الدولار والسوق السوداء مع الفجوة اللي حصلت في الأسعار بين المعروض والمطلوب نتيجة خروج الأموال الساخنة واللي وصلت إلى 22 مليار دولار ودا كلف الدولة مليارات إضافية كمان مع ارتفاع أسعار السلع عالميا نتيجة العقوبات الامريكيه والغربية على روسيا اكبر مورد للسلع الغذائية والحبوب في العالم مع تأثر صادرات اوكرانيا كمان وهي بلد مصدر للسلع دي.
ومع اي انخفاض في سعر الدولار المفترض أسعار السلع المستوردة زي السيارات والسلع الأساسية تنزل هي كمان لأن المستوردين هيستوردا بسعر أقل .. لكن فيه حاجة مهمة مش واخدين بالنا منها وهي الدورة الاستيرادية ودي ببساطة دورة بتاخد حوالي 3 شهور وهي المدة بين الاتفاق على الاستيراد وبين وصول السلع للأسواق المصرية وطبعا سعر الدولار بيتحسب في أول أيام الدورة الاستيرادية دي.. يعني المستوردين اتفقوا من 3 شهور على السلع اللي بتدخل البلد دلوقتي وطبعا كان وقتها سعر الدولار لسه عالي .
ومعني كده بردو إن الدولار لو استمر في النزول الفترة الجاية المستوردين هيعقدوا صفقات الاستيراد بالسعر المخفض للدولار وساعتها ممكن نشوف نزول حقيقي في أسعار السيارات والسلع الأساسية المستوردة وقطع الغيار والمواد الخام اللازمة للتصنيع المحلي وغيرها اي حاجة مستوردة في الوقت الحالي المفترض تطرح في الأسواق بعد انتهاء الدورة دي بأسعار مخفضة ودي مهمة الحكومة الأساسية في الفترة الجاية خاصة مع تأكيدها على توافر الدولار والسلع في الأسواق وزيادة الإنتاج المحلي.
يعني باختصار كده الكورة دلوقتي في ملعب الحكومة والمستوردين وبعدهم التجار في مسألة الأسعار دي لكن الدولار عمل اللي عليه ونزل وفيه حاجة لازم ناخد بالنا منها وهي إن المنافسة هتفرض على التجار خفض السعر عشان يبيع طالما كده كده مش خسران ودا ممكن نشوفه بشكل واضح في أسعار السيارات الفترة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
