الحكومة تستعد لـ "الأيام الصعبة".. هنقولك الدولة بتعمل إيه لتأمين غاز المصانع

الحكومة في الوقت الحالي بدأت تأمن مشروعات الطاقة لقطاع الصناعة، وبدأت تجهز نفسها لفصل الصيف بتأمين الغاز الطبيعي.. ياتري الحكومة هتعمل تامين طاقة قطاع الصناعة ازاي.. واية خطة الحكومة لتعاقدات استيراد الغاز.

قطاع الصناعة واحد من اكثر القطاع اللي الحكومة حريصة جدا في الوقت الحالي علي تامين احتياجاته من الطاقة، خصوصا أن الدولة عندها خطة لتحويل مصر لمركز اقليمي لتبادل الطاقة، والخطة دي مش هتكمل الا لو وفرنا مصادر اللازمة لتشغيل المصانع، خصوصا أن أول سؤال المستثمرين واصحاب رؤوس الأموال الأجنبية بيسالوا عليه قبل ما يدخلوا اي سوق خارجي.

الفترة اللي فاتت الحكومة استهدفت توسيع مصادر الطاقة من كل المجالات خصوصا مجالات الطاقة الجديدة والمتجددة، واللي الهدف منها اتاحة مصادر التيار لكل المشروعات سواء كانت استخدامات منزلية أو صناعية، وكمان الحكومة استهدفت التوسع في انشاء محطات الطاقة الشمسية للمشروعات الصناعية وقدمت تسهيلات كبيرة جدا للمستثمرين واصحاب رؤوس الأموال الأجنبية لبناء محطات طاقة شمسية لتشغيل المصانع والشركات والمنشأت الاقتصادية.

طيب ازاي الحكومة هتوفر مصادر الطاقة التقليدية للمشروعات الصناعية؟.
الحكومة ممثلة في وزارة البترول والثروة المعدنية حاليا عندها خطة للتوسع في البحث والتنقيب عن الاكتشافات البترولية الجديدة، وشركات خالدة وبتروبل وجابكو نجحوا في الوقت اللي فات في تحقيق 3 اكتشافات جديدة للبترول والغاز في مناطق امتيازهم بالصحراء الغربية وخليج السويس.

الاكتشافات البترولية الجديدة للشركات بتؤكد وجود احتياطيات متوقعة قبل حفر البئر بمقدار 12.5 مليون برميل زيت، وحاليا الشركات في مرحلة مد خط الإنتاج واللي هتكون باستثمارات هتوصل لـ 10 مليون دولار، واللي هتشمل استكمال خطة حفر عدد من الآبار استكشافية واليل بتستهدف تعظيم إنتاج الشركات من الغاز الطبيعي في الفترة اللي جاية، وهيوصل الانتاج المتوقع من البئر 30 مليون قدم مكعب غاز يوميا.

التسهيلات الكبيرة اللي قدمتها الحكومة لدخول الشركات ورؤوس الأموال الأجنبية للسوق المصري، خلت كبري الشركات يبقي عندها رغبة للدخول لمصر، وده اللي خلي عدد كبير من الشركات في الوقت الحالي تبدا تعلن عن اكثر من كشف بترولي كان اخرهم الكشف اللي اعلنت عنه شركة بتروبل واللي اعلنت عن كشف بترولي كبير الاسبوع اللي فات بمنطقة غرب فيران في خليج السويس والتوقعات الأولية للانتاج بتأكد انه هيكون لـ2660 برميل زيت في اليوم، والشركة حاليا في مرحلة تقييم الاحتياطي المضاف من البئر.

شركة بترول مش هيا الوحيدة اللي اعلنت عن كشف بترولي جديد، ده كان قبلها شركة جابكو واللي اعلنت عن كشف بترولي في بداية شهر مايو الحالي في رمال الكريم وهيوصل اجمالي الانتاج منه لـ720 برميل زيت في اليوم.