شايفين اللي بيحصل؟، مصر دلوقتي بتخوض رحلة تنقيب جبّارة في قلب الصحراء، وبتحفر 44 بئر استكشافي جديد… بس المرة دي مش أي حفر.. وده اللي هتطلع منه دهب عالي التركيز ومش أي دهب.. بس يعني إيه عالي التركيز؟.. وإزاي هنقدر نستفيد منه؟..
مصر دلوقتي داخلة على مرحلة جديدة خالص، وهي بتدور على الدهب عالي التركيز في الآبار الكبيرة، وده اللي ممكن يكون بنفس مستوى منجم السكري أو أعلى كمان، الآبار دي بتتحفر في مناطق جديدة واعدة في الصحراء الشرقية، وبالتعاون مع شركات مصرية وأجنبية عندها خبرة كبيرة في التنقيب.
طيب يعني إيه "ذهب عالي التركيز"؟، يعني أنك تلاقي في الطن الواحد من الصخور كمية ذهب كبيرة، وده بيخلي الاستخراج مربح جدًا، ويوفر لمصر دخل ضخم من غير ما تحتاج تصرف كتير على عمليات التصفية والمعالجة، وده جزء من خطة مصر عشان تزود احتياطياتها من الذهب، وتفتح المجال لإنشاء مصانع صهر وتكرير وتصدير، بدل ما نصدر الخامات على طول ونشتري الذهب تاني بأسعار خيالية.
طيب إيه اللي حصل؟.. اللي حصل أن شركة آتون الكندية توصلت لنتايج مبشرة للمرحلة التالتة من حفر منطقة سمنا للدهب في مصر، واللي قالت أن فيه نتايج واعدة في المرحلة التالتة من برنامج الحفر بمشروع “سمنا” الواقع داخل امتياز “أبو مروات” في جنوب مصر.
تحاليل الشركة كشفت أن فيه دهب بنسب مرتفعة جدا في عدة مواقع داخل المنطقة، وده اللي بيعزز فرص تطوير مشروع تعدين جديد في أحد أقدم مواقع الدهب التاريخية في مصر.
الشركة كمان حفرت 44 بئر بإجمالي أطوال تجاوزت الـ 5.257 متر، واللي تم تحليل نتايج أول 25 بئر فقط لحد دلوقتي، واللي أكدت أن فيه دهب عالي التركيز.
طب مشروع "سمنا" ده موجود فين؟
مشروع سمنا ده على بعد 27 كيلو من منطقة حمامة و13 كيلو من رودروين، واللي بترجع أهميته أنه واحد من أقدم مناطق تعدين الدهب في مصر، واللي بترجع عمليات التنقيب فيه لعهد الفراعنة واستمرت لحد بدايات القرن العشرين.
طب ليه الشركة وقفت الشغل في المشروع؟
الشركة أعلنت أنها وقفت الحفر مؤقتا في "سمنا" عشان قررت أنها تنقل المعدات لمنطقة حمامة، من أجل تنفيذ آبار مياه ضمن خطة تجهيز البنية التحتية للمشروع، وهترجع بعدها تاني تستأنف الحفر في مشروع "سمنا" خلال الشهرين الجايين.
بس المفاجأة هنا إيه؟
الشركة أعلنت أنها هتعمل برنامج حفر جديد في منطقة "أبو مروات" خلال الأسابيع الجاية، وده في إطار خطتها، لضم منطقتي "سمنا" و"أبو مروات" لدراسة الجدوى المبدئية اللي عملتها السنة اللي فاتت، وده عشان يمهدوا تطوير مشاريع تعدين الدهب داخل الامتياز.
الخلاصة، أن مصر بتفتح مجال لإنشاء مصانع صهر وتكرير وتصدير، بدل ما نصدر الخامات على طول ونرجع نشتري الدهب تاني بأسعار خيالية، ده غير الفوايد بتاعت المشاريع دي، واللي منها وجود استثمارات جديدة، وفرص شغل للشباب، مان هتدخل دولارات وهتدعم الاقتصاد الوطني.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
