وجهت الدكتورة سماح عبد الفتاح، الاستشارية الأسرية، رسالة دعم واطمئنان لكل عروس في أول يوم لها في عش الزوجية، مؤكدة أن الليلة الأولى يجب أن تكون بداية للأمان والحب، لا مصدرًا للخوف أو الضغط، مشددة على أن دور الزوج في هذه الليلة أساسي في احتواء زوجته وطمأنتها، ومطالبًا إياه بالرفق والحكمة والتفاهم.
وقالت "عبد الفتاح"، خلال برنامج "الرحلة"، المذاع على قناة الناس، اليوم الخميس: "رسالتي النهارده لكل عروسة جميلة... في أول يوم، في أول أسبوع، في أول لحظة من حياتها الزوجية، عايزة أقولك بكل حب: اطمني، والرسالة مش ليكي لوحدك، دي ليكي ولشريكك، لأن هو خلاص بقى الأمان بتاعك، بقى الراجل اللي ربنا جعله حلالك وحاميك من الليلة دي وطول العمر."
وأضافت الاستشارية الأسرية: "واحدة من أجمل العبارات اللي قريتها عن الليلة دي: ما لا يُؤخذ بالذوق لا يعظم له الشوق، يعني ببساطة، الهدوء واللين هم اللي بيبنوا العلاقة دي صح، والبداية دي مش زي أي بداية، دي لحظة فارقة، واللي فيها مشاعر كتير، مزيج من حب وثقة وأمان، بس في المقابل كمان فيه رهبة وقلق، وده طبيعي."
وتابعت: "كل أب وأم ربوا بناتهم على الحفاظ والخصوصية، وفجأة المجتمع بيطلب من البنت دي إنها تنقلب في لحظة وتكون جاهزة لحياة تانية، من غير تمهيد حقيقي، ومن غير فهم كافي، وهنا ييجي دور العريس... هو اللي معاه البوصلة، واللي لازم يوجه الليلة دي للسلام، مش للعنف، للود، مش للضغط."
بطلب من كل شاب خليك رحيم
وواصلت: "أنا بطلب من كل شاب، خليك رحيم، خليك حنون، خليك فاهم إنك بتتعامل مع بنت داخلة على حياة جديدة بكل تفاصيلها، مش بس علاقة جسدية، لأ، دي شراكة روحية وإنسانية كاملة. ولو تعبتوا يومها أو حسيتوا إنكم مش قادرين، عادي، ارتاحوا، مفيش مشكلة. المهم إن البداية تكون صح، فيها طمأنينة وحب وستر."
وأضافت: أوصي كل عريس وعروسة بركعتين قبل أي شيء، نبدأ بالبركة، نبدأ بالدعاء، نبدأ بسؤال ربنا إنه يبارك في البيت ده ويحفظكم من كل شر، افتكروا دعاء النبي صلى الله عليه وسلم: بسم الله، اللهم جنبنا الشيطان وجنب الشيطان ما رزقتنا، ده دعاء بسيط لكن أثره كبير في حياتكم."
وأردفت: "في بنات كتير للأسف داخلين الليلة دي بخوف شديد، بسبب معلومات غلط أو تجارب سلبية وصلت لهم، وده خلّى في صور مشوهة للعلاقة دي.. السرية في الأمور دي مطلوبة، وخصوصيتها مقدسة.. ما فيش غير زوجك اللي تتكلمي معاه في التفاصيل دي. هو الوحيد اللي من حقه يسمع ويعرف ويحتوي."
وتابعت: "الرجولة مش إثبات جسدي، الرجولة الحقيقية في الليلة دي هي شهامة، صبر، تفاهم، واحتواء.. وإنك تكون راقي لدرجة تخليها ترتاح وتثق فيك. ولو حصل إن أول ليلة ما كانتش مثالية، مش نهاية الدنيا، بس اللي هتكسبه إنك كسبت شريكة عمرك بثقة، ودي البداية الحقيقية لحياة سعيدة بإذن الله".
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
