النهاردة الرئيس عبد الفتاح السيسي استعرض اخر تطورات الأوضاع الاقتصادية والمالية ودا في اجتماع مهم جدا في رئاسة الجمهورية ضم الدكتور مصطفى مدبولي رئيس الحكومة ووزير المالية أحمد كجوك ومحافظ البنك المركزي المصرفي الكبير حسن عبد الله.
الاجتماع كان بيناقش ملفات مهمة جدا طبعا وواضح إنه كان خاص باستعراض السياسة النقدية لمصر في الفترة الجاية وكمان مراجعة الخطط اللي تم تنفيذها في الفترات اللي فاتت.. وفي خلال الاجتماع الرئيس السيسي وجه محافظ البنك المركزي المصري بضرورة العمل على زيادة مستويات الاحتياطي من النقد الأجنبي وبالتزامن مع دا يتم خفض مديونية أجهزة الموازنة العامة للدولة وتقليل المديونية الخارجية لضمان تحقيق التوازن المالي.
ورغم أن الرئيس السيسي اتكلم عن كل جوانب الاقتصاد واستمع لشرح مدبولي وكجوك وحسن عبد الله لكن كان تركيز الرئيس السيسي على مسألة الاحتياطي ودا شيء غريب شوية لأن الاحتياطي النقدي بيحقق فعلا طفرات من مدة كبيرة وداخل على 48 مليار دولار وعلى نهاية السنة هيوصل 50 مليار دولار ومتوقع يوصل الى 73 مليار دولار في السنين اللي بعدها لكن الرئيس السيسي اكيد عنده أسبابه الخاصة عشان يطلب زيادة الاحتياطي النقدي كمان وكمان ودا لأن القيادة السياسية بتشوف بزاوية أوسع وعندها معلومات من كل القطاعات بخلاف حسابات الأمن القومي بكل أبعاده ونقدر نخمن إن الرئيس السيسي عامل حساب اي تطورات سلبية في الأزمات اللي حولينا والاحتياطي النقدي من أهم عوامل الأمان المالي والاقتصادي لمصر ولاي دولة .
وقلنا قبل كده في بانكير ان أي ارتفاع في الاحتياطي النقدي لمصر معناه تحسن الوضع الاقتصادي والمالي للدولة المصرية بشكل كبير وإيجابي وبيزيد من توافر الدولار في السوق المصري في السنين الجاية ومعناها بالتالي استقرار سوق الصرف بسبب توقعات إستمرار التدفقات الدولارية للسوق المصري وكمان معناه زيادة موارد الدولة الدولارية من كافة القطاعات ودا اللي أتوقعه صندوق النقد الدولي مؤخرا.
طيب الاحتياطي بيجي منين؟
الاحتياطي النقدي عامة هو عبارة عن فوائض النقد الأجنبي في البنك المركزي سواء دولار أو عملات تانية بجانب مشتريات الدهب اللي بتدخل في مكونات الاحتياطي النقدي لاي بنك مركزي ومصادر الاحتياطي بتيجي من قطاعات الدولة المختلفة اللي بتجيب دولار ومن مصادر التمويل والمبادرات الخاصة زي الطروحات الحكومية مثلا .. وكلنا عارفين وظيفة الاحتياطي في مصر وأولها تأمين احتياجات مصر من السلع الاستراتيجية لفترات زمنية معينة على مدار السنة وكمان مواجهة أي خطر أو هزات مالية أو اقتصادية واحيانا بيتم استخدامه للوفاء بالتزامات مصر المالية خارجيا.. يعني باختصار كده الاحتياطي النقدي عبارة عن فلوس متشالة على جمب للظروف الطارئة ولحاجات معينة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
