يا ترى ليه صندوق النقد الدولي حذر مصر من الاسراع بتخفيض الفايدة؟ وليه التحذير ده دلوقتي بالذات وايه تأثيره على مناخ الاستثمار فى مصر؟ والأهم هو ايه أصلا القواعد والعوامل اللي بيعتمد عليها صناع السياسة النقدية بالبنك المركزي لتحديد أسعار الفايدة؟ و إيه اللي ممكن يحصل لو البنك المركزي خفّض الفايدة بسرعة زيادة؟
قبل اي حاجة خلينا نفهم الأول يعني إيه تخفيض الفايدة؟
أسعار الفايدة هي اللي بيحددها البنك المركزي المصري .. ودي بتأثر على كل حاجة في حياتنا .. من تمن السلع في السوق .. لحد تكلفة القروض اللي بناخدها من البنوك .. لما الفايدة بتترفع .. القروض بتبقى غالية .. والناس بتفكر ألف مرة قبل ما تستلف .. وده بيساعد على تهدية التضخم .. يعني بيخلّي الأسعار في السوق ماتنطش زيادة عن اللزوم .. أما لو الفايدة اتخفضت .. القروض بتبقى أرخص .. الناس بتستلف أكتر .. والاقتصاد بيبدأ يتحرك .. بس لو الخفض ده حصل في وقت غلط .. ممكن التضخم يرجع يولّع من تاني.
طب ليه صندوق النقد بيقول ماتخفضوش بسرعة؟
صندوق النقد بيبص على الصورة الكبيرة .. وبيقول لمصر: "بلاش تستعجلوا .. العالم كله في حالة ضبابية دلوقتي!" .. عشان قرارات الرئيس الأمريكي دونالد ترامب الأخيرة بخصوص الرسوم الجمركية .. الرسوم دي بتأثر على التجارة العالمية .. وبترفع تكلفة السلع في كل حتة .. وممكن تخلّي التضخم يزيد مش بس في مصر .. لكن في العالم كله .. ولو التضخم زاد .. الجنيه المصري ممكن يضعف أكتر .. وده هيخلّي الحياة أغلى علينا كلنا.
وإيه اللي حصل في مصر فعلاً؟
الشهر اللي فات .. البنك المركزي المصري خفّض الفايدة لأول مرة من خمس سنين تقريبًا .. نزّلها 225 نقطة أساس .. يعني من 27.25% لـ 25% .. ليه؟ .. عشان التضخم بدأ يهدى .. وصل 13.6% .. وده أقل بكتير من الذروة اللي كانت في سبتمبر 2023 .. بس صندوق النقد بيقول: "حاسبوا .. الطريق لسه طويل!" ..عشان التضخم لسه ممكن يرجع لو القرارات اتاخدت بسرعة زيادة .. خصوصًا مع الحرب التجارية بين أمريكا والصين .. والتوترات الجيوسياسية في المنطقة.
طب البنك المركزي بيعتمد على إيه في قرارا تحديد سعر الفايدة ؟
البنك المركزي مش بيرمي الزهر وبيضرب الودع .. ده بيبص على كذا عامل زي معدل التضخم.. يعني لو التضخم عالي .. الفايدة لازم تبقى عالية عشان تهدّي الأسعار .. ولو التضخم بدأ يقل .. ممكن يفكروا في تخفيض الفايدة.. كمان بيبص على سعر الصرف.. الجنيه لو ضعيف .. بيحاولوا يدعموه برفع الفايدة عشان يجذبوا مستثمرين أجانب .. لكن لو خفّضوا الفايدة بسرعة .. ممكن الجنيه يخسر أكتر.. بالاضافة للوضع العالمي.. زي اللي حصل مع قرارات ترامب .. أو زي ارتفاع أسعار الطاقة والسلع بسبب الحروب أو التوترات؟.. وكمان تدفقات رأس المال.. يعني الفلوس اللي بتدخل وتخرج من مصر .. زي اللي حصل لما مليار دولار طلعوا من السوق المصري في أبريل بسبب الرسوم الجمركية الجديدة
صندوق النقد شايف إيه؟
جهاد أزعور .. مدير إدارة الشرق الأوسط في صندوق النقد .. قال كلام مهم: "لازم نبقى صاحيين في إدارة السياسة النقدية" .. يعني لازم البنك المركزي يبقى زي الحارس اللي مابينمش .. عشان لو التضخم رجع .. هيبقى صعب نلحق نتحكم فيه .. وده ممكن يضرب الاقتصاد المصري كله .. خصوصًا إن مصر لسه بتتعافى من أزمة اقتصادية كبيرة .. اتسندت فيها بدعم مالي ضخم من الإمارات وصندوق النقد بـ 57 مليار دولار.
اللى لازم نكونوا عارفينوا .. ان تخفيض الفايدة زي السكينة .. لو استخدمتها صح .. هتساعد الاقتصاد ينمو .. لكن لو استعجلت .. ممكن تجرح نفسك .. صندوق النقد بيقول لمصر: "خلّيكي حذرة .. التضخم لسه ممكن يرجع .. والعالم كله في حالة فوضى" .. والبنك المركزي لازم يبقى زي اللاعيب اللي بيلعب شطرنج .. كل خطوة لازم تكون مدروسة .. عشان الاقتصاد المصري يفضل واقف على رجليه.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
