مارينا عالمية وفنادق فاخرة في رأس الحكمة.. مصر هتكسب إيه منه؟ - غاية السعودية

غاية السعودية يكتُب.. هو إيه اللي بيحصل في الساحل الشمالي؟، ليه الكل بيتكلم عن رأس الحكمة؟.. يعني الإمارات خلاص هتبدأ المرحلة الأولى من المشروع؟.. وهل ده هيغير خريطة السياحة في مصر.

تخيل كده معايا، أن الساحل الشمالي يوصل لمستوى دبي ونيس الفرنسية، تلاقي على يمينك فنادق فاخرة ومارينا عالمية وعلى شمالك وحدات سكنية وسياحية وخدمات خمس نجوم، وده اللي الإمارات ناوية تعمله فعلا في رأس الحكمة!

في خطوة جديدة بتوضح قد إيه الشراكة الاقتصادية بين مصر والإمارات قوية، وجه بعد ما أعلنت شركة "مدن" القابضة الإماراتية عن تنفيذ المرحلة الأولى من مشروع مدينة رأس الحكمة، واللي هيتم فيها تطوير حوالي 12 ألف فدان على الساحل الشمالي.

المرحلة الأولى فيها إيه؟

المرحلة الأولى هيكون فيها 7 فنادق فاخرة ومارينا بحرية عالمية ووحدات فندقية وسكنية، وبيع أول وحدات هيبدأ قبل نهاية السنة دي، يعني المشروع ماشي بأقصى سرعة.

طيب المشروع كله هيكلف كام؟

إجمالي استثمارات المشروع وصلت لـ 35 مليار دولار، وده أكبر مشروع مشترك بين مصر والإمارات لحد دلوقتي، واللي هيتعمل على مراحل، أولها تطوير حوالي 50 مليون متر مربع، والمساحة الكاملة للمشروع: 170 مليون متر مربع، والباقي هيتم تطويره بالشراكة مع كبار المطورين المصريين والدوليين.

والمشروع تحت إشراف مباشر من شركة مشروع رأس الحكمة للتطوير العمراني المملوكة لـ"ADQ" و"مدن القابضة".

طب هل المشروع ده مجرد استثمار؟

طبعا مش استثمار بس، ده شاركة استراتيجية والموضوع مش مجرد مدينة جديدة، وده جزء من خطة الحكومة المصرية لتحويل الساحل الشمالي من مصيف موسمي لمركز سياحي عالمي طول السنة، ده كمان شراكة بتفتح الباب لشغل واستثمار وتنمية حضارية وسياحة فاخرة.

طيب مصر هتستفاد إيه؟

مصر هتستفاد كتير جدا، أولها أن آلاف الشباب هتلاقي فرص عمل كتير جدًا، وده هيضخ عملة صعبة في الاقتصاد المصري، ده غير أنه هيرفع قيمة الساحل الشمالي كمركز سياحي عالمي وهيحسن البنية التحتية والخدمات في المنطقة، وهيجذب مستثمرين من كل حتة في العالم

الخلاصة.. أن اللي بيحصل في رأس الحكمة مش بس مشروع، دي نقلة نوعية في شكل السياحة والاستثمار في مصر، والشراكة مع الإمارات بتأكد إننا رايحين على مستقبل كبير، وبنخطط نكون على الخريطة السياحية العالمية من أوسع أبوابها.