يا ترى ايه سر ارتفاع تحويلات المصريين فى الخارج بحوالي 50% في آخر 7 شهور؟ وإيه اللي يخلي واحد قاعد في الخليج أو أوروبا أو أمريكا، يقول: لأ.. أنا هحوّل فلوسي على البنوك في مصر من غير ما أتردد؟ هو إيه اللي تغيّر؟ وإزاي التحويلات دي وصلت لأعلى مستوى تاريخي في يوليو اللي فات؟ وإيه المكاسب اللي حصلت واللي لسه ممكن تحصل؟
اللي حصل إن التحويلات بتاعت المصريين في الخارج قفزت بنسبة 49.7% خلال أول 7 شهور من السنة دي.. يعني وصلنا لـ23.2 مليار دولار.. مقابل 15.5 مليار بس في نفس الفترة السنة اللي فاتت.. تخيل الرقم فرق حوالي 8 مليار دولار في 7 شهور بس.
مش بس كده.. في يوليو 2025، التحويلات عملت رقم قياسي تاريخي.. 3.8 مليار دولار في شهر واحد، بزيادة 26.3% عن يوليو 2024 اللي كان حوالي 3 مليار دولار.. وده يعتبر أعلى مستوى شهري في تاريخ التحويلات المصرية.
طب إزاي ده حصل؟
الحقيقة إن في شغل كبير اتعمل من البنوك ومن البنك المركزي عشان يرجّعوا ثقة العاملين بالخارج في الجهاز المصرفي المصري… أول حاجة البنوك بدأت تقدم أسعار صرف منافسة جدًا، وتسهيلات بتحسسك إنك مش مجرد عميل عادي، لأ.. إنت شريك…يعني مثلًا، فيه برامج خاصة للمصريين في الخارج، حسابات بالدولار، شهادات ادخار بعائد مرتفع، وكمان سهولة في فتح الحسابات وإدارة الفلوس أونلاين من أي حتة في العالم.
والأهم من ده كله إن التحويلات بقت بتوصل بسرعة وبأسعار تحويل أقل من اللي بيقدمها السوق غير الرسمي.وده خلّى المصري المغترب يقول طب ما هو كده أأمن وأسهل.. وأنا كسبان في الآخر.
ولو جينا نبص على السنة المالية كلها.. من يوليو 2024 ليونيو 2025.. التحويلات زادت 66.2%** كاملة ووصلت لـ36.5 مليار دولار، بعد ما كانت 21.9 مليار بس السنة اللي قبلها ,, يعني تقريبًا ضعف الرقم.
أما الربع الأخير من السنة المالية دي من أبريل ليونيو 2025، التحويلات زادت *34.2%* عن نفس الفترة السنة اللي فاتت.. ووصلت 10 مليار دولار.
كل دي أرقام بتقول رسالة واضحة: المصريين في الخارج رجعوا يثقوا ورجعوا يحوّلوا فلوسهم عبر القنوات الرسمية، والبنوك المصرية كسبت التحدي.
طب ده معناه إيه بقى للاقتصاد المصري؟
الموضوع مش مجرد أرقام.. التحويلات دي تعتبر من أهم مصادر العملة الصعبة في مصر، جنب قناة السويس والسياحة والاستثمار الأجنبي.
يعني كل دولار داخل من المصريين في الخارج بيساعد الدولة تدبّر احتياجاتها من الاستيراد، ويسند الجنيه المصري، ويقوّي الاحتياطي النقدي.
و لو الاتجاه ده استمر والناس فضلت واثقة مصر هتلاقي عندها مصدر مستقر من العملة الصعبة يقدر يحمي الاقتصاد حتى في الأوقات الصعبة ودي حاجة مش بسيطة خالص.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
