هو ايه اللي بيحصل في قطاع الملابس في مصر؟ وليه فجأة لقينا شركات تركية وصينية بمليارات الدولارات بتجري عشان تستثمر هنا؟ وإيه السر اللي خلى مصر تتحول لـ "قبلة" الاستثمارات الأجنبية في قطاع الغزل والنسيج؟
في الوقت اللي ناس كتير بتتكلم عن التحديات الاقتصادية، فيه شركات أجنبية عملاقة شايفة في مصر فرصة ذهبية.. فيه آلاف من فرص الشغل اللي بتيجي في الطريق ومشروعات بمليارات الدولارات بتحط حجر الأساس لمستقبل صناعة جديدة.
قطاع الملابس والمنسوجات في العالم كله بيتنقل باستمرار من مكان لمكان و دايماً بيدور على البلد اللي فيها "التكلفة المنخفضة" عشان يفضل ينافس في السوق العالمي.
تركيا مثلاً كانت من أكبر المنافسين في القطاع ده، لكن في السنين الأخيرة، تكاليف الإنتاج عندها زادت بشكل كبير أجور العمالة ارتفعت وأسعار الكهربا والمياه زادت.. وكل ده خلى المنتجات التركية تفقد ميزتها التنافسية الشركات التركية دي، عشان تحافظ على صادراتها اللي بتوصل لـ 40 مليار دولار في السنة، كان لازم تدور على بديل.
وهنا بتيجي مصر.. مصر بكل بساطة بقت الجنة اللي بيدوروا عليها.
طب إيه اللي بيجذب المستثمرين الأجانب؟
حاجت طنيرة اولها العمالة الرخيصة ومصر عندها عمالة مدربة، وتكلفة أجورها أقل بكتير من دول تانية.
وتاني حاجة اتفاقيات التجارة.. مصر عندها اتفاقيات تجارية مع دول كتير في العالم.. يعني الشركة اللي بتصنع في مصر بتقدر تصدر منتجاتها للدول دي من غير جمارك، وده بيوفر عليها كتير.
وتالت حاجة الأراضي الصناعية المجهزة.. الحكومة المصرية بتوفر أراضي صناعية مجهزة بكل الخدمات، زي منطقة القنطرة غرب اللي بيتم فيها استثمارات بمليارات الدولارات. ده بيسهل على الشركات إنها تبني مصانعها بسرعة وبأقل مجهود.
ولأن الأرقام دايما بتختصر كلام كتير .. ففي السنتين اللي فاتوا بس، فيه أكتر من 1000 شركة تركية صغيرة ومتوسطة دخلت السوق المصري، و150 شركة منهم بنت مصانع جديدة باستثمارات وصلت لـ 3 مليارات دولار. ده غير استثمارات تانية جاية في الطريق من شركات عملاقة، زي شركة "إروجلو جارمنت" اللي استثمرت 40 مليون دولار لوحدها في مصنع ضخم هيوفر آلاف من فرص الشغل.
والقائمة لسه طويلة.. فيه 60 شركة تانية، أغلبها صينية وتركية، بتستكشف السوق المصري حالياً، وممكن يجيبوا معاهم استثمارات جديدة توصل لـ 3 مليارات دولار كمان في سنة 2026.
مصر بتثبت كل يوم إنها ممكن تكون مركز صناعي كبير، مش بس في المنطقة، لكن في العالم كله. مش بس بتكسب استثمارات بالمليارات، لكن كمان بتخلق فرص شغل جديدة، وبتزود صادراتنا، وبتعزز مكانتنا في الاقتصاد العالمي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
